అతడికి 109ఏళ్లు.. ఆమెకు 108ఏళ్లు.. 90ఏళ్లుగా కలిసి నడుస్తున్నారు!

ఇంటర్నెట్ డెస్క్: అతడికి 109 ఏళ్లు.. ఆమెకు 108 సంవత్సరాలు. వారిద్దరికీ 90ఏళ్ల క్రితం వివాహం జరిగింది. ఏళ్లు గడిచినా వారి మధ్య ప్రేమానురాగాలు ఇసుమంత కూడా తగ్గలేదు. దానికి నిదర్శనం ప్రస్తుతం సోషల్ మీడియాలో వైరల్ అవుతున్న ఈ వీడియోనే. ఈ వీడియోను చూసి స్పందిస్తున్న నెటిజన్లు.. వారికి అభినందనలు తెలుపుతూ కామెంట్స్ చేస్తున్నారు. కాగా.. చైనాలో అత్యంత వృద్ధదంపతులుగా గుర్తింపు పొందిన ఈ జంటకు సంబంధించిన పూర్తి వివరాల్లోకి వెళితే..

109ఏళ్ల వృద్ధుడు, 108ఏళ్ల వృద్ధురాలు.. వైవాహిక జీవితంలోకి అడుగుపెట్టి 90 సంవత్సరాలు పూర్తయ్యాయి. ఈ నేపథ్యంలో తాజాగా 90వ వివాహ వార్షికోత్సవాన్ని ఈ వృద్ధ దంపతులు ఘనంగా జరుపుకొన్నారు. 108ఏళ్ల బామ్మ తెలుపు రంగు దుస్తులు ధరించగా.. ఆయన మాత్రం నలుపు రంగు సూటూ బూటూ వేసుకుని తళుక్కుమన్నాడు. ఇద్దరు కలిసి రకరాల స్టైల్లో ఫొటోలకు ఫోజులిచ్చారు. ఈ దృశ్యాలకు సంబంధించిన వీడియో ప్రస్తుతం నెట్టింట వైరల్‌గా మారింది. ఈ క్రమంలో ‘చిన్న చిన్న కారణాలకే పెళ్లి నాటి ప్రమాణాలను తుంగలో తొక్కి.. విడిపోతున్న అనేక మంది భార్యాభర్తలు మిమ్మల్ని ఆదర్శంగా తీసుకోవాలి’ అని పేర్కొంటూ నెటిజన్లు కామెంట్లు చేస్తున్నారు.