Abn logo
Sep 17 2020 @ 04:24AM

16 నెలల్లో ఇంత ఘోరమైన అవినీతా?

పైగా టీడీపీ అవినీతి చేసిందని ఎదురుదాడి

మంత్రి పెద్దిరెడ్డి తోక కత్తిరిస్తాం: చంద్రబాబు హెచ్చరిక

అమరావతి, సెప్టెంబరు 16(ఆంధ్రజ్యోతి): ఒక ప్రభుత్వం  16నెలల్లోనే ఇంత ఘోరమైన అవినీతికి పాల్పడడం చరిత్ర లో లేదని మాజీ సీఎం చంద్రబాబు వ్యాఖ్యానించారు. అవినీతి బురదలో కూరుకుపోయిన వైసీపీ నేతలు ఆ బురదను టీడీపీపై చల్లి తప్పించుకోవాలని చూస్తున్నారని టీడీపీ పాలనపై అవినీతిముద్ర వేయడానికి ఎదురుదాడి చేస్తున్నారని విమర్శించారు. బుధవారం ఆయన రాజంపేట లోక్‌సభ నియోజకవర్గం పరిధిలోని టీడీపీ నేతలతో ఆన్‌లైన్‌ సమావేశం నిర్వహించారు. ‘సొంత మద్యం బ్రాండ్లు పెట్టుకుని ఇష్టానుసారం రేట్లు పెంచి.. వేల కోట్లు దోచుకుంటున్నారు. ఇసుకను బ్లాక్‌ చేసి ఆదాయ మార్గంగా మలుచుకున్నారు. ప్రజల జేబులు గుల్ల చేస్తున్నారు. ఇళ్లస్థలాల పేరుతో భూములు కొనుగోలు చేసి వందల కోట్లు గడించారు. దౌర్జన్యంగా ఇతరుల నుంచి గనులు లాక్కుంటున్నారు. ఆ పార్టీ వారు తప్ప ఇతరులు టెండర్లు వేసే పరిస్థితి లేదు. ప్రతి పనికీ కమీషన్లు.. ప్రతి పనిలో వాటాలు ఈ ప్రభుత్వ విధానంగా మారిపోయాయి’ అని విరుచుకుపడ్డారు. చిత్తూరు జిల్లాలో మంత్రి పెద్దిరెడ్డి రామచంద్రారెడ్డి, ఆయన కుటుంబ సభ్యుల ఆగడాలు మరీ మితిమీరి పోతున్నాయని, పిచ్చిపిచ్చి వేషాలు వస్తే తోకలు కత్తిరిస్తామని ఆయన హెచ్చరించారు. 


ఆ చిన్నారిలో  ఏ నేరస్థుడు కన్పించాడు? 

వైసీపీ నేత ఫిర్యాదు చేశాడని.. కృష్ణాజిల్లా జగ్గయ్యపేట మండలం జయంతిపురం గ్రామానికి చెందిన ఏడేళ్ల బాలిక సహా భూక్యా కుటుంబీకులను చిల్లకల్లు పోలీసు స్టేషన్‌లో నిర్భంధించడంపై చంద్రబాబు మండిపడ్డారు. ఆ చిన్నారిలో మీకు ఏ నేరస్థుడు కన్పించాడని ట్విటర్‌లో ప్రశ్నించారు. కాగా, ప్రపంచ న్యాయవాదుల దినోత్సవం సందర్భంగా న్యాయవాదులందరికీ ట్విటర్‌లో చంద్రబాబు శుభాకాంక్షలు తెలిపారు. అలాగే వరల్డ్‌ బార్బర్స్‌ డే సందర్భంగా నాయీబ్రాహ్మణులకు, విశ్వకర్మ జయంతి సందర్భంగా విశ్వబ్రాహ్మణులందరికీ చంద్రబాబు ట్విటర్‌లో శుభాకాంక్షలు తెలిపారు. 

Advertisement
Advertisement
Advertisement