ప్రభుత్వ సలహాదారుడిగా బ్రహ్మానందరెడ్డి

(ఆంధ్రజ్యోతి ఒంగోలు)

ఉమ్మడి ప్రకాశం జిల్లాలో సీనియర్‌ నేతల్లో ఒకరైన వైసీపీ రాష్ట్ర అధికార ప్రతినిధి బత్తుల బ్రహ్మానందరెడ్డిని రాష్ట్ర ప్రభుత్వం ప్రత్యేక సలహాదారుడిగా నియమించింది. వ్యవసాయ మార్కెటింగ్‌, కోఆపరేటివ్‌ సలహాదారుడిగా వ్యవహరించబోతున్నారు. ఆ మేరకు ప్రభుత్వం శుక్రవారం సాయంత్రం ఉత్తర్వులు జారీ చేసింది. ప్రస్తుతం బాపట్ల జిల్లా పర్చూరు నియోజకవర్గం ఎర్రంవారిపాలేనికి చెందిన బ్రహ్మానందరెడ్డి వైసీపీ ఆరంభం నుంచి ఆ పార్టీలో ఉన్నారు. అంతకుముందు టీడీపీ నుంచి 1994లో పర్చూరు అసెంబ్లీ నియోజకవర్గం నుంచి పోటీ చేసి ఓడిపోయారు. ఆ తర్వాత ఆ పార్టీకి జిల్లా అధ్యక్షుడిగా కూడా పనిచేశారు. వైసీపీ ఆవిర్భావం తర్వాత తొలుత ఓదార్పు యాత్ర ఉమ్మడిప్రకాశం జిల్లా కన్వీనర్‌గా, ఆ తర్వాత జిల్లా అధికార ప్రతినిధిగా, ప్రస్తుతం రాష్ట్ర అధికార ప్రతినిధిగా పనిచేస్తున్నారు. సుమారు 20 ఏళ్ల పాటు సొసైటీ అధ్యక్షుడిగా, చీరాల సహకార స్టోర్స్‌ అధ్యక్షుడిగా, ఆ తర్వాత రైతు సంఘాల్లో పనిచేసిన అనుభవం ఉన్న ఆయనను ప్రభుత్వం మార్కెటింగ్‌ శాఖ సలహాదారుడిగా నియమించింది. సీఎంకి, ఆ పార్టీ నేతలు సజ్జల, విజయసాయిరెడ్డి, వైవీ సుబ్బారెడ్డి, వేమిరెడ్డి ప్రభాకర్‌రెడ్డి ప్రోత్సాహంతో పదవి లభించిందని ఆయన ఆంధ్రజ్యోతికి చెప్పారు. పర్చూరు వైసీపీ ఇన్‌చార్జిగా రామనాథంబాబుకు మద్దతుగా ఆయన ఉండడం, ప్రస్తుతం రామనాథంబాబును మార్చి మరొకరిని నియమించాలని ఆ పార్టీ అధిష్టానం నిర్ణయం తీసుకున్న నేపథ్యంలో బ్రహ్మానందరెడ్డికి పదవి దక్కడం విశేషంగా రాజకీయ పరిశీలకులు చెబుతున్నారు. కాగా, మార్కెటింగ్‌, సహకార రంగాల్లో ఆయనకు ఉన్న అనుభవాన్ని వినియోగించి ప్రజలకు సేవచేస్తానని, ఆ రంగాల ప్రజల సమస్యలను ప్రభుత్వం దృష్టికి తీసుకెళ్తానని ఆయన చెప్పారు.