Aug 4 2021 @ 09:01AM

Tollywood : అశ్లీల సన్నివేశానికి భక్తిగీతం బ్యాక్‌గ్రౌండ్‌ మ్యూజిక్‌.. చివరికి..

  • ‘ఇప్పుడు కాక ఇంకెప్పుడు’ సినిమా ట్రైలర్‌ వివాదాస్పదం
  • సుమోటోగా కేసు నమోదు చేసిన సిటీ సైబర్‌ క్రైమ్స్‌ పోలీసులు
  • క్షమాపణ కోరుతూ వీడియో విడుదల చేసిన దర్శకుడు

హైదరాబాద్ సిటీ/హిమాయత్‌నగర్‌ : ‘ఇప్పుడు కాక ఇంకెప్పుడు’ సినిమా నిర్మాత, దర్శకుడిపై సిటీ సైబర్‌క్రైమ్స్‌ పోలీసులు కేసు నమోదు చేశారు. ఇటీవల విడుదల చేసిన ట్రైలర్‌లోఅశ్లీల సన్నివేశానికి ఓ భక్తి గీతాన్ని బ్యాక్‌గ్రౌండ్‌ మ్యూజిక్‌గా జోడించడంపై హిందూ సంఘాలు తీవ్ర అభ్యంతరం వ్యక్తం చేశాయి. సినిమా నిర్మాత, దర్శకుడు, సంగీత దర్శకుడిపై చర్యలు తీసుకోవాలని డిమాండ్‌ చేశాయి. దీంతో సిటీ సైబర్‌క్రైమ్స్‌ పోలీసులు సుమోటోగా కేసు నమోదు చేశారు. హిందువుల మనోభావాలు దెబ్బతినేలా ట్రైలర్‌ ఉందని సైబర్‌క్రైమ్స్‌ ఏసీపీ కేవీఎం ప్రసాద్‌ అన్నారు. 


క్షమాపణ కోరిన దర్శకుడు యుగంధర్‌

అశ్లీల సన్నివేశానికి అలాంటి బ్యాక్‌గ్రౌండ్‌ మ్యూజిక్‌ పెట్టడం ముమ్మాటికి తప్పేనని, తాను దాన్ని గమనించలేదని సినిమా దర్శకుడు యుగంధర్‌ అన్నారు. సినిమా యూనిట్‌ తరఫును తాను క్షమాపణ కోరుతున్నానని యుగంధర్‌ సోషల్‌ మీడియాలో ఓ వీడియో పోస్టు చేశారు.

వనస్థలిపురం పోలీస్‌ స్టేషన్‌లో ఫిర్యాదు

‘ఇప్పుడు కాక ఇంకెప్పుడు’ చిత్ర యూనిట్‌పై వనస్థలిపురం పోలీస్‌ స్టేషన్‌లో విశ్వహిందూ పరిషత్‌ ప్రతినిధులు ఫిర్యాదు చేశారు. హిందువుల విశ్వాసాలను, మనోభావాలను గాయపరుస్తూ  చిత్రం ట్రైలర్‌ను  యూట్యూబ్‌లో విడుదల చేసిన చిత్ర దర్శకుడు, నిర్మాత, నటీనటులు తదితరులపై క్రిమినల్‌ కేసులు నమోదు చేసి అరెస్టు చేయాలని వీహెచ్‌పీ రాష్ట్ర అధికార ప్రతినిధి రావినూతల శశిధర్‌, బీజేపీ మల్కాజిగిరి పార్లమెంట్‌ జాయింట్‌ కన్వీనర్‌ పోచంపల్లి గిరిధర్‌ వేర్వేరుగా ఫిర్యాదు చేశారు.