Mafiveer అంటూ మోదీపై ఛలోక్తులు విసిరిన Rahul Gandhi

న్యూఢిల్లీ: అగ్నిపథ్ డిఫెన్స్ రిక్రూట్‌మెంట్ స్కీమ్ (Agnipath Defence recruitment Schemd)ను ఉపసంహరించుకోవాలని దేశ యువత ఆందోళనలు చేపట్టిన నేపథ్యంలో వారికి మద్దతుగా కాంగ్రెస్ ఎంపీ రాహుల్ గాంధీ శనివారం ట్వీట్ చేశారు. గత ఏడాది రైతుల నిరసనతో సాగు చట్టాలను రద్దు చేసిన తరహాలోనే అగ్నిపథ్ స్కీమ్‌ను బీజేపీ సర్కార్ ఉపసంహరించుకుంటుందని అన్నారు.

ఎనిమిదేళ్లుగా బీజేపీ ప్రభుత్వం ''జై జవాన్, జై కిసాన్'' విలువలను అవమానిస్తూనే ఉందని విమర్శించారు. కేంద్ర ప్రభుత్వంపై  ఛలోక్తులు విసురుతూ, గత ఏడాది రైతు చట్టాలపై రైతులకు క్షమాపణ చెప్పిన రీతిలోనే ఈ దేశ యువతకు  క్షమాపణలు చెప్పాల్సి ఉందని అన్నారు. సాగు చట్టాలను ప్రధాని ఉపసంహరించుకుంటారని గత ఏడాది కూడా తాను చెప్పానని, ఇప్పుడు కూడా ప్రధాని మోదీ 'మాఫీవీర్‌'(క్షమాపణలు చెప్పే వ్యక్తి)గా మారి మరోసారి దేశయువత డిమాండ్‌కు తలొగ్గుతారని, అగ్నిపథ్‌ను వెనక్కి తీసుకుంటారని రాహుల్ హిందీలో ట్వీట్ చేశారు.