భారత్‌లో బంగ్లాదేశ్ అమ్మాయిలు.. బయటపడిన భారీ సెక్స్ రాకెట్.. అక్కడి నుంచి ఇక్కడి వరకూ ఎలా వచ్చారో తెలిస్తే..
ABN , First Publish Date - 2021-10-05T17:59:14+05:30 IST
బంగ్లాదేశ్‌కు చెందిన ఆ వ్యక్తి భారత్‌లో భారీ సెక్స్ రాకెట్...
బంగ్లాదేశ్‌కు చెందిన ఆ వ్యక్తి భారత్‌లో భారీ సెక్స్ రాకెట్ నడుపుతున్నాడు. ఉద్యోగాల పేరుతో యువతులకు వలవేసి, ఇక్కడకు తీసుకువచ్చి, వారని వ్యభిచార కూపంలోకి లాగుతున్నాడు. ఎట్టకేలకు ఎంపీలోని ఇండోర్ పోలీసులు అతని ఆటకట్టించారు. ఆ నిందితుని పేరు మునీర్ ఉరఫ్ మునీరూల్. పోలీసుల విచారణలో మునీర్ పలు విస్తుపోయే విషయాలను వెల్లడించాడు. నిందితుడు బంగ్లాదేశ్ నుంచి 200 మందికిపైగా యువతులను తన మాయమాటలతో మోసగించి, భారత్‌కు తీసుకువచ్చి ఇక్కడ వ్యభిచారం చేయించాడు. మునీర్ ప్రతీనెలా 55 మందికిపైగా యువతులను భారత్ తీసుకు వచ్చేవాడు. ఐదేళ్లుగా మునీర్ ఇదే దందా నిర్వహిస్తున్నాడు.
మునీర్ 75 మందికిపైగా యువతులను వివాహం చేసుకున్నాడు. ఇండోర్ సిట్ అధికారులు నిందితుడు మునీర్‌ను సూరత్‌లో అరెస్టు చేశారు. నిందితుడు మునీర్ యువతులను బంగ్లాదేశ్, భారత్‌ల సరిహద్దుల గుండా ఇక్కడికి తీసుకువస్తుంటాడు. తరువాత ఆ యువతులను ఏజెంట్లు ముర్షిదాబాద్‌తోపాటు అక్కడికి సమీపంలోని గ్రామీణ ప్రాంతాలకు తరలించి, భారత్‌లోకి ప్రవేశించేలా ఏర్పాట్లు చేస్తాడు. కాగా ఇండోర్ పోలీసులు 11 నెలల క్రితం లసూడియా, విజయ్‌నగర్‌లలో దాడులు చేసి, 21 మంది బంగ్లాదేశ్ యువతులకు విముక్తి కల్పించారు. అలాగే మునీర్‌ను పట్టించినవారికి ఇండోర్ పోలీసులు 10 వేల రూపాయల బహుమానం కూడా ప్రకటించారు. మునీర్ స్వస్థలం బంగ్లాదేశ్‌లోని జసోర్. తరచూ వివాహాలు చేసుకుంటూ, వారిని భారత్‌కు తరలిస్తూ వచ్చాడు. ఇందుకోసం మునీర్ భారీ నెట్‌వర్క్ ఏర్పాటు చేసుకున్నాడు.
బంగ్లాదేశ్ నుంచి అపహరించి తీసుకు వచ్చిన యువతులకు కోల్‌కతా, ముంబైలలో వ్యభిచార వృత్తిలో శిక్షణ ఇప్పిస్తాడు. ఆ తరువాత డిమాండ్‌ను అనుసరించి, ఆ యువతులను భోపాల్‌తో పాటు ఇతర పట్టణాలకు తరలించి వ్యభిచార కార్యకలాపాలు కొనసాగిస్తుంటాడు. మునీర్.. బంగ్లాదేశ్‌లో ఏర్పాటు చేసిన ఏజెంట్ అక్కడి పేదింటి యువతులకు ఉద్యోగం ఆశచూపి, దొంగచాటుగా వారిని ముందుగా కోల్‌కతా తీసుకువస్తారు. వారం రోజుల పాటు వారిని అక్కడే ఉంచుతారు. ఆ తరువాత వారికి వ్యభిచారం కొనసాగించడానికి సంబంధించిన వివిధ అంశాలలో శిక్షణ ఇస్తారు. ఇది పూర్తయ్యాక వారిని ముంబై తరలిస్తారు. అక్కడ మరోమారు ట్రైనింగ్ ఇచ్చాక, దేశంలోని ఇండోర్, భోపాల్, గ్వాలియర్, పూణె, ముంబై, బెంగళూరు తదితర ప్రాంతాలకు తరలిస్తామని నిందితుడు మునీర్ పోలీసుల విచారణలో తెలిపాడు.
