క్రికెట్‌లో ఆ రూల్ పెట్టడం కష్టం: బ్రెట్‌లీ

కాన్‌బెర్రా: కరోనా కారణంగా ప్రపంచమే మారుతోంది. క్రికెట్‌లో కూడా పలు మార్పులు సంభవించేలా కనిపిస్తున్నాయి. వాటిలో ఒకటి ఉమ్మి, చెమటలతో బంతిని తుడవకుండా ఉండే రూల్. ఇప్పటికే ఈ రూల్ అమలుకు సంబంధించి క్రికెట్ బోర్డులు సంప్రదింపులు జరుపుతుండగా.. పలువురు బౌలర్లు దీనిని వ్యతిరేకిస్తున్నారు. ఈ నేపథ్యంలో ఆస్ట్రేలియా మాజీ పేసర్ బ్రెట్‌లీ ఈ నిబంధనపై తన అభిప్రాయాన్ని వెల్లడించాడు. ప్రస్తుత కరోనా పరిస్థితుల్లో క్రికెట్‌కు సంబంధించి ఈ నిబంధన మంచి పరిణామమేనని, అయితే దీనిని అమలు చేయడం చాలా కష్టమని చెప్పాడు. ‘బౌలర్లు తమ జీవితాంతం బంతిని ఉమ్మితో తుడిచి షైన్ చేసేందుకు అలవాటు పడి ఉంటారు. ఒక్కసారిగా అది మారిపోవాలంటే సాధ్యం కాకపోవచ్చు’ అని బ్రెట్‌లీ చెప్పుకొచ్చాడు.