బాల్యంలోనే ఆమెకు వివాహం.. అనుకోని రీతిలో భర్త ఎడబాటు.. తిరిగి భర్తను అలా చూసేసరికి..

భజరంగ్ సింగ్ తన 19 ఏళ్ల వయసులో 1971లో బారత్-పాక్ యుధ్దంలో అమరుడయ్యాడు. అంతకుముందు అతనికి శ్యామావతి(13)తో వివాహం జరిగింది. పెళ్లి తరువాత భార్యాభర్తలు ఏనాడూ కలుసుకోలేదు. శ్యామావతి అత్తవారింటికి వెళ్లేముందే.. భజరంగ్ సింగ్ 1971లో జరిగిన భారత్-పాక్ యుధ్దంలో ప్రాణాలు కోల్పోయాడు. పాక్ సైన్యం విసిరిన బాంబు భజరంగ్ సింగ్ దగ్గరున్న యుద్ధ ట్యాంకుపై పడింది. ఈ ఘటనలో భజరంగ్ సింగ్ అమరుడయ్యాడు. ఆ తరువాత అతని పార్థివ దేహాన్ని గ్రామానికి తీసుకువచ్చారు. అప్పుడు తొలిసారిగా శ్యామావతి త్రివర్ణ పతాకం కప్పివుంచిన భర్త మృతదేహాన్ని చూసింది. ఈ పరిస్థితిలో భర్తను చూడగానే ఆమె కన్నీటి పర్యంతమయ్యింది. ఆ తరువాత ఆమె మరో వివాహం చేసుకోలేదు.

ప్రస్తుతం రాజస్థాన్‌లోని బెహ్రార్‌లో ఉంటున్న ఆమెను విజయ్ దివస్ సందర్భంగా ఘనంగా సన్మానించారు. ఈ సందర్భంగా ఆమె నాటి అనుభవాన్ని మీడియాకు తెలిపారు. భజరంగ్ సింగ్ మృతిచెందాడనే సమాచారాన్ని అధికారులు తనకు తెలియజేసి, గ్రామానికి రప్పించారన్నారు. భర్త మృతదేహాన్ని త్రివర్ణ పతాకంతో కప్పివుండగా చూశానన్నారు. తాను భర్తను చూసింది అదే మొదటిసారి, చివరిసారని అన్నారు. ఆ తరువాత భర్త జ్ఞాపకాలతోనే జీవితాన్ని గడిపేశానని, మరో వివాహం చేసుకోలేదని తెలిపారు. తన బాధ్యతలను తన సోదరి చూసుకున్నదని, ఇప్పుడు ఆమె కుమారులు తనను చూసుకుంటున్నారని శ్యామావతి తెలిపింది.