Annoyed By Parrot : రామచిలుక అరుపులు, చప్పుళ్లు తట్టుకోలేక కేసు పెట్టాడు..

పుణె : ఓ 72 ఏళ్ల పెద్దాయనకు పక్కింటివారి రామచిలుక(Parrot) తెగ చిరాకు తెప్పించింది. అరుపులు, రెక్కల చప్పుళ్లు వేగలేక ఏకంగా పోలీస్‌స్టేషన్‌లో ఫిర్యాదు చేసిన ఘటన మహారాష్ట్ర(Maharastra)లోని పుణె(Pune)లో వెలుగుచూసింది. ఈ ఘటనకు సంబంధించిన పూర్తి వివరాలు ఈ విధంగా ఉన్నాయి. పొరుగింటి అక్బర్ అంజాద్ ఖాన్‌ పెంచుకుంటున్నట్టు చిలుక నిరంతరం అరుపులు, చప్పుళ్లతో తనను తెగ ఇబ్బందిపెడుతోందంటూ ఖాడ్కీ పోలీస్ స్టేషన్‌లో 72 ఏళ్ల సురేష్ షిండే ఫిర్యాదు చేశాడు. చిలుక కారణంగా తాను కలవరానికి గురవుతున్నట్టు ఫిర్యాదులో సురేష్ షిండే వాపోయాడు. పుణె నగరంలోని శివాజీనగర్‌లో వీళ్ల హౌసింగ్ కాంప్లెక్స్ ఉందని స్టేషన్ అధికారి వివరించారు.

కాగా నాన్-కాగ్నిజబుల్ ఆఫెన్స్‌గా పరిగణలోకి తీసుకున్నట్టు పోలీసులు చెప్పారు. అంటే షిండే ఫిర్యాదు ఆధారంగా చిలుక యజమానిని అరెస్ట్ చేయడం సాధ్యపడదు. ఈ వ్యవహారాన్ని న్యాయస్థానం పరిధిలో తేల్చుకోవాల్సి ఉంటుందని ఖడ్కీ పోలీస్ స్టేషన్ అధికారి చెప్పారు. ఈ కేసులో నిబంధనల ప్రకారం ముందుకెళ్తామని వివరించారు.