కరోనా ఎఫెక్ట్.. కీలక నిర్ణయం తీసుకున్న విమానయాన సంస్థలు!

వాషింగ్టన్: అమెరికాకు చెందిన అమెరికన్, యునైటెడ్ విమానయాన సంస్థలు కీలక నిర్ణయం తీసుకున్నాయి. కొవిడ్ నేపథ్యంలో ఏర్పడ్డ నష్టాలను పూడ్చుకోవడానికి ఉద్యోగులను తొలగించేందుకు సిద్ధమయ్యాయి. వివరాల్లోకి వెళితే.. కరోనా వైరస్ కారణంగా అమెరికన్ ఎయిర్‌లైన్స్.. ఈ ఏడాది తొలి ఆరు నెలల్లో దాదాపు 5బిలియన్ డాలర్లను నష్టపోయింది. యునైటెడ్ ఎయిర్‌లైన్స్.. సుమారు 3.3 బిలియన్ డాలర్లను నష్టపోయింది. ఈ క్రమంలో ఉద్దీపన ప్యాకేజీని ప్రకటించాలని.. ప్రభుత్వాన్ని కోరాయి. ఈ సంస్థలు చేసిన వినతిని చట్టసభల సభ్యులు తోసిపుచ్చారు. దీంతో నష్టాలను పూడ్చుకోవడానికి ఉద్యోగాలను తొలగించాలనే నిర్ణయానికి వచ్చాయి. కాగా.. అమెరికా, యునైటెడ్ ఎయిర్‌లైన్స్ తీసుకున్న ఈ నిర్ణయం వల్ల.. సుమారు 32వేల మంది ఉద్యోగాలు కోల్పోనున్నారు.