బీర్బల్‌ ఛాయిస్‌!

ఒకరోజు అక్బర్‌ మహారాజు బీర్బల్‌తో....‘బీర్బల్‌! నీకు ఒక బంగారు నాణెం, న్యాయం ఇస్తే, రెండింటిలో ఏది ఎంచుకుంటావు?’ అని ప్రశ్నించాడు. అందుకు బీర్బల్‌ ఏమాత్రం తడుముకోకుండా ‘బంగారు నాణెం’ అని సమాధానమిచ్చాడు. ఆ సమాధానం విని అక్బర్‌ ఆశ్చర్యపోయాడు. వెంటనే ‘న్యాయం కన్నా నీకు బంగారు నాణెం ఎక్కువా?’ అని ప్రశ్నించాడు అక్బర్‌. ‘అవును జహాపనా!’ అన్నాడు బీర్బల్‌.

ఆ సమాధానంతో సభలో ఉన్న అందరూ ఆశ్చర్యపోయారు. ‘మా దగ్గర పనిచేసే వాళ్లలో ఎవరు ఈ సమాధానం  చెప్పినా నేను ఆశ్చర్యపోయే వాణ్ణి కాదు. కానీ నువ్వు చెప్పడం నేను నమ్మలేకపోతున్నాను’ అన్నాడు అక్బర్‌. బీర్బల్‌ అందుకు సమాధానంగా ‘జహాపనా! ఎవరైనా వాళ్ల దగ్గర లేని దాన్నే కావాలని కోరుకుంటారు కదా! ఈ రాజ్యంలో అందరికీ న్యాయం అందుబాటులో ఉంది. నాకు కూడా న్యాయం అందుబాటులో ఉంది. కానీ నా దగ్గర ఎప్పుడూ డబ్బుకు లోటే ఉంటుంది. అందుకే బంగారు నాణెం ఎంచుకున్నాను’ అని సమాధానం ఇచ్చాడు. ఆ సమాధానం విన్న అక్బర్‌ ఎంతో సంతోషించి, బీర్బల్‌కు వెయ్యి బంగారు నాణేలు ఇచ్చి సత్కరించాడు.