ఇస్రో ప్ర‌యోగించిన ఉప‌గ్ర‌హం మిహిర క‌క్ష్య త‌ప్పుతుంది. దీని వ‌ల్ల ప్ర‌పంచ వ్యాప్తంగా క‌మ్యూనికేష‌న్స్ దెబ్బ‌తింటాయి. దీంతో ఇస్రో దీన్ని స‌రి చేసే ప‌నిలో ప‌డుతుంది. అయితే దాన్ని స‌రిచేసే వ్య‌క్తి ఎవ‌రా? అని ఆలోచిస్తే వారికి దొరికే స‌మాధానం దేవ్‌(వ‌రుణ్ తేజ్‌). అయితే దేవ్ కొన్ని వ్య‌క్తిగ‌త కార‌ణాల వ‌ల్ల సెల‌వుల‌పై ఉంటాడు. అత‌నెక్క‌డుంటాడో ఎవ‌రికీ తెలియ‌దు. దాంతో శాస్త్రవేత్త‌లు ఏం చేయాల‌ని ఆలోచిస్తారు. చివ‌ర‌కు రియా(అదితిరావు హైద‌రి) రంగంలోకి దిగి దేవ్ అచూకి క‌నిపెడుతుంది. అత‌న్ని అంత‌రిక్షంలోకి వెళ్ల‌డానికి ఎలా ఒప్పిస్తుంది? చివ‌ర‌కు దేవ్ అంతరిక్షంలోకి వెళ్లి ఏం చేశాడు? స‌మ‌స్య‌ను ప‌రిష్క‌రించాడా? అని తెలుసుకోవాలంటే సినిమా చూడాల్సిందే...

 

 

 

సాధార‌ణంగా హాలీవుడ్ బాండ్ సినిమాల్లో హీరో క‌న‌ప‌డ‌కుండా ఉంటాడు. అత‌న్ని వెతికి ప‌ట్టుకుని ప్రాజెక్ట్ అప్ప‌గించ‌డం అనే స్టైల్లో ఈ సినిమాలో కొన్ని వ్య‌క్తిగ‌త కార‌ణాల వ‌ల్ల హీరో సెల‌వుల్లో ఉంటాడు. అతన్ని ప‌ట్టుకుని ప్రాజెక్ట్ అప్ప‌గిస్తారు. దేవ్ పాత్ర‌లో వ‌రుణ్‌తేజ్ చ‌క్క‌గా ఒదిగిపోయాడు. అస్ట్రానాయిడ్ పాత్ర‌లో హుందాగా న‌టించాడు. అదితిరావు హైద‌రి.. లేడీ అస్ట్ర్రానాయిడ్‌గా, దేవ్‌ను గోల్ వైపు మ‌ళ్లించే పాత్ర‌లో చ‌క్క‌గా న‌టించింది. స‌త్య‌దేవ్ డ్యూయెల్ రోల్‌లో న‌టించాడు. అవ‌స‌రాల శ్రీనివాస్ పాత్ర ఫుల్ లెంగ్త్ క్యారెక్ట‌ర్‌లో న‌టించాడు. రెహ‌మాన్‌, లావ‌ణ్య త్రిపాఠి త‌దిత‌రులు వారి వారి పాత్ర‌ల మేర చ‌క్క‌గా న‌టించారు. ఇక సాంకేతికంగా చూస్తే..

ఘాజి సినిమాతో తెలుగు సినిమాను కొత్త మ‌లుపు తిప్పిన ద‌ర్శ‌కుడు సంక‌ల్ప్‌.. రెండో సినిమా ఎలా ఉంటుందోన‌ని అంద‌ర‌రూ ఆస‌క్తిగా ఎదురుచూశారు. అంద‌రి ఆలోచ‌న‌ల‌కు భిన్నంగా అంత‌రిక్షం అనే టైటిల్ పెట్టి తొలి టాలీవుడ్ స్పేస్ మూవీని తెర‌కెక్కించాడు. ఆది నుండి ఓ టెంపోను క్యారీ చేయించాడు. ద‌ర్శ‌కుడి ఆలోచ‌న‌కు హ్యాట్పాఫ్ చెప్పాల్సిందే. 25-30 కోట్ల బ‌డ్జెట్‌లో హాలీవుడ్ ఆలోచ‌నాస్థాయి మూవీ చేయ‌డం గొప్ప విష‌యం. జ్ఞాన‌శేఖ‌ర్ సినిమాటోగ్ర‌ఫీతో సినిమాను నెక్ట్స్ రేంజ్‌కు తీసుకెళ్లాడు. గ్రాఫిక్స్ చాలా బాగా చేశాడు. రాజీవ్ ను ఈ విష‌యంలో అభినందించాల్సిందే. ఇలాంటి సినిమాల‌కు డైలాగ్స్ రాయ‌డం కూడా గొప్ప విష‌యం. కిట్టు మంచి డైలాగ్స్ రాశాడు. పాట‌లు క‌థానుగుణంగా ఉన్నాయి. ఇలాంటి సినిమాల్లో ఎంట‌ర్‌టైన్‌మెంట్‌, కామెడీ స‌న్నివేశాల‌ను ఆశించడం త‌ప్పే అవుతుంది. గ్రిప్పింగ్ సినిమా ర‌న్ అవుతుంది. టెక్నిక‌ల్ ట‌ర్మ్స్ నార్మ‌ల్ ప్రేక్ష‌కుల‌కు అర్థం కాక‌పోవ‌చ్చు. క‌మ‌ర్షియ‌ల్ సినిమాల‌ను ఇష్ట‌ప‌డే ప్రేక్ష‌కులకు సినిమా న‌చ్చ‌దు. అయితే కొత్త అటెంప్ట్ చేసిన యూనిట్‌ను, ద‌ర్శ‌కుడి టేకింగ్‌, గ్రాఫిక్స్‌, నిర్మాణ విలువ‌ల‌ను అభినందించాల్సిందే...