Apr 16 2017 @ 10:08AM

బాలీవుడ్‌లో మోసాలు అందుకే దక్షిణాదిన నటిస్తున్నా: ప్రదీప్‌ రావత్‌

విలన్‌ పాత్రల్లో కొత్త లుక్‌తో తెలుగువారిని ఆకట్టుకున్న నటుడు ప్రదీప్‌రావత్‌ . రాజమౌళి తన గాడ్‌ఫాదర్‌ , తెలుగు చిత్ర పరిశ్రమ గాడ్‌ మదర్‌ అని గర్వంగా చెబుతారాయన . పాతికేళ్ళుగా తెలుగు, తమిళ, హిందీ, మళయాల, కన్నడ, ఒరియా భాషల్లో వందకు పైగా చిత్రాల్లో నటించారు.. తెలుగు చిత్ర పరిశ్రమ అంటే తనకెంతో గౌరవమనీ , హిందీ చిత్ర పరిశ్రమలో రెమ్యునరేషన్ మోసాల కారణంగానే నటులు దక్షిణాదికి వస్తున్నారనీ అంటున్న ప్రదీప్‌ రావత్‌ ఇంటర్వ్యూ ...
 
నేను 1952లో న్యూఢిల్లీలో పుట్టాను. మా నాన్నగారి పేరు మంగల్‌సింగ్‌ రావత్‌. రిటైర్డ్‌ మేజర్‌. నా పూర్తి పేరు ప్రదీప్‌ రామ్‌సింగ్‌ రావత్‌. హిమాచల్‌ ప్రదేశ్‌ రాష్ట్రం సిమ్లాలోని మిలటరీ పాఠశాలలో నా ప్రాథమిక విద్యాభ్యాసం పూర్తిచేశాను. ఇంటర్మీడియట్‌, డిగ్రీ, పోస్టుగ్రాడ్యుయేషన్‌ జబల్‌పూర్‌ ప్రభుత్వ సైన్స్‌ కాలేజీలో చేశాను.
 
మహాభారత్‌ సీరియల్‌
దూరదర్శన్‌ ఢిల్లీ ఛానల్‌ నుండి దాదాపు రెండేళ్ళు ప్రసారమైన ‘మహాభారత్‌’ మెగా సీరియల్‌లో నటించాను. ఇదే నా మొదటి సీరియల్‌. అశ్వద్ధామ పాత్ర పోషించాను. నా నటనకు మంచి పేరు వచ్చింది. ఈ సీరియల్‌లోకి నన్ను తీసుకోమని దర్శకుడు రవిచోప్రాకు ప్రముఖ హిందీనటీమణి స్మితాపాటిల్‌ సిఫార్సు చేయడం అతిముఖ్యమైన విశేషం. నా జీవితంలో ఆమె చేసిన సహాయం ఎన్నటికీ నేను మరచిపోలేను. దేశంలోని కోట్లాదిమంది ప్రేక్షకులు ఈ సీరియల్‌ చూశారు. బి.బి.సి ఛానల్‌ కూడా దీన్ని ప్రసారం చేసింది. అలా బి.బి.సిలో రావడం అదే మొదటిసారి.
 
రాజ్‌బబ్బర్‌తో స్టేజ్‌ నాటకాలు
ఈ సీరియల్‌ ఒకవైపు ప్రసారం అవుతున్న సమయంలోనే నేను ఎన్నో స్టేజీ నాటకాల్లో నటించేవాణ్ణి. ముంబయి, కోల్‌కత, చెన్నై, ఢిల్లీ నగరాల్లోని పలు ఆడిటోరియమలలో ఎన్నో నాటకాల్లో అనేక పాత్రలు పోషించాను. ప్రముఖ హిందీ నటుడు రాజ్‌బబ్బర్‌ నాటక సంస్థ ద్వారా ఎన్నో నాటకాల్లో పాల్గొన్నాను. నాతోపాటు రాజ్‌బబ్బర్‌, అనుపమ్‌ఖేర్‌, ఆయన సతీమణి ఠాకూర్‌కిరణ్‌ ‍, అనితాకవార్‌, అలోక్‌నాథ్‌ నటించేవారు. వారందరితో కలిసి అనే నాటకాల్లో స్టేజీ పంచుకున్నాను.
 
ఏ సపోర్టూ లేకుండానే బాలీవుడ్‌లోకి
బాలీవుడ్‌లో నాకు ఎవ్వరూ పరిచయస్థులు లేరు. కానీ నా పర్సనాలిటీ చూసి నా స్నేహితులు, శ్రేయోభిలాషులు మాత్రం, ‘నువ్వు సినిమాల్లో చేరితే బాగా రాణిస్తావు’ అంటూ ఎంకరేజ్‌ చేసేవారు. మోడలింగ్‌ కూడా చేసేవాణ్ణి. ఆ సమయంలో బాలీవుడ్‌లో నాకు ఎలాంటి గైడెన్స్‌గానీ, సపోర్ట్‌గానీ లేదు. స్వయంకృషి, పట్టుదలే నన్ను ఇంతవాణ్ణి చేసింది.
 
 
తొలి హిందీ చిత్రం బాఘి
హిందీలో నా మొదటి చిత్రం బాఘి (BAAGHI). కొన్ని చిత్రాల్లో చిన్న చిన్న పాత్రలు చేసినప్పటికీ ‘బాఘి’ ద్వారా నాకు గుర్తింపు వచ్చింది. ఇందులో సల్మాన్‌ఖాన్‌, నగ్మా హీరోహీరోయిన్లు. శక్తీకపూర్‌, కిరణ్‌కుమార్‌, ఆశాసచ్‌దేవ్‌, బీనాబెనర్జీ తదితరులు నటించారు. 1990లో ఈ చిత్రం సూపర్‌హిట్‌ కావడంతో నాదశ తిరిగి నా సినీనట జీవితం యూ టర్న్‌ తీసుకోకుండా పురోగమించింది. ఎన్నో చిత్రాల్లో ఆఫర్లు రావడం ప్రారంభమైంది. దర్శకులకు కాల్‌షీట్లు ఇవ్వలేని నిస్సహాయస్థితిలో పడిన రోజులు కూడా ఉన్నాయి. ఎంతోమంది దర్శకుల పరిచయ భాగ్యం కలిగింది. నా సినీ జీవితంలో అదో కొత్తదశ.
 
ప్రేక్షకులు మెచ్చిన నా చిత్రాలు
ప్రముఖ హిందీ దర్శకుల చిత్రాల్లో నటించాను. అపరాధి, ఇన్‌సానియత్‌, దుష్మని, రాజ్‌కుమార్‌, కోయల, అమితాబ్ హీరోగా నటించిన ‘దీవార్‌’, షరాబి, లగాన్‌, గజని చిత్రాలు నా హిందీ చిత్రజీవితంలో మైలురాళ్ళుగా నిలిచిపోతాయి. ముఖ్యంగా సల్మాన్‌ఖాన్‌ గజని చిత్రం నాకు ఇంకా ఎక్కువ పేరు తెచ్చిపెట్టింది. దాంతో తెలుగు చిత్ర పరిశ్రమ నుంచి ఆహ్వానం లభించింది. కోయల చిత్రంలో పోలీస్‌ కమీషనర్‌ పాత్రకు ఇంకా మంచిపేరు వచ్చింది.
 
రాజమౌళి పరిచయం తెలుగులో అవకాశాలు
రాజమౌళిగారు లగాన్‌ చిత్రం చూసి నా నటన మెచ్చుకుంటూ తన మేనేజర్‌ను ముంబయిలోని అమీర్‌ఖాన్‌ ఆఫీసుకు పంపించారు. అక్కడ నా అడ్రస్‌ తెలుసుకుని ఆ మేనేజర్‌ మా ఇల్లు వెతుక్కుంటూ వచ్చారు. ఆ వెంటనే రాజమౌళిగారితో ఫోన్లో మాట్లాడాను. నన్ను హైదరాబాద్‌ రమ్మని చెప్పారు. నేను వెళ్లి ఆయన కలవడం, ఆయిన ఇచ్చిన ఆఫర్‌కు ‘సై’ అనడం జరిగాయి. తెలుగులో నేను నటించిన మొదటి చిత్రం ‘సై’. సూపర్‌హిట్‌ మూవీ. ఈ చిత్రంలో అంత బాగా నటిస్తానని నేనే అనుకోలేదు. ఇక అప్పటినుండి తెలుగులో మంచిపాత్రల్లో నటించేందుకు అవకాశాలు రావడం ఆరంభమైంది. ఎందరో దర్శకులు ఫోన్లు చేయడం ప్రారంభించారు. కానీ హిందీ చిత్రాల్లో అగ్రిమెంట్ల కారణంగా తెలుగులో ఎక్కువ కాల్షీట్లు ఇవ్వలేకపోయాను.
 
            రాజమౌళిగారి మరో చిత్రం ‘ఛత్రపతి’లో కూడా విలన్‌గా నా నటన అద్భుతం అని ఎంతోమంది అభిమానులు నాపైన అభినందనల వర్షం కురిపించారు. ఇంత చక్కని అవకాశం కల్పించిన రాజమౌళిగారికి నేను ఎప్పుడూ రుణపడి ఉంటాను. ఆయన నాకు గాడ్‌ఫాదర్‌. ఆయన దర్శకత్వంలో వచ్చిన రెండు చిత్రాలూ నాకు రెండు కళ్ళులాంటివి. సై చిత్రాన్ని హిందీలో ‘ఆర్‌–పార్‌’ పేరుతో 2004లో నిర్మించారు. దీనినే ‘ఛాలెంజ్‌’ గా మలయాళంలోకి డబ్బింగ్‌ చేశారు. ఛత్రపతి చిత్రాన్ని తమిళంలో అదే పేరుతోనూ, మలయాళంలో ‘చంద్రమౌళి’గా హిందీలో హుకూమత్‌కి జంగ్‌ గా డబ్‌ చేశారు. కన్నడంలో మాత్రం ‘ఛత్రపతి’ పేరుతోనే రీమేక్‌ చేశారు.
 
            తెలుగులో నేను నటించిన చిత్రాలన్నీ విజయవంతమైనవే. దేశముదురు, రాజన్న, పూలరంగడు, బాద్‌షా, సౌఖ్యం, సరైనోడు, వీర, అల్లుడుశీను, లయన్‌, నాయక్‌, రగడ, బలదూర్ నా టాలీవుడ్‌ కెరీర్‌లో మరువలేని చిత్రాలు. ఇలా అవకాశాలు ఇచ్చిన దర్శకనిర్మాతలందరికీ నా ధన్యవాదాలు తెలియజేసుకుంటున్నాను. ప్రేక్షకులు ఈ చిత్రాలన్నీ ఆదరించారు. ఉత్తమ విలన్‌గా 'సై' చిత్రానికి ఫిలిమ్‌ఫేర్‌ అవార్డు, ఉమ్మడి ప్రభుత్వ నంది అవార్డు సహా ఎన్నో వందల అవార్డులు అందుకున్నాను. భారతదేశ ప్రముఖ భాషల్లో నటించడం అదృష్టంగా భావిస్తున్నాను. ఒక ఇంగ్లీషు చిత్రంలో కూడా నటించాను.
 
బాహుబలిలోలేనందుకు బాధగా ఉంది
రాజమౌళిగారి బాహుబలి లో ఎంత చిన్న పాత్ర ఇచ్చినా చేయాలనే కుతూహలం ఉండేది. అందులో నటించలేకపోయాననే బాధ ఉంది. బాహుబలి–2కి కూడా నన్ను పిలవకపోవడం ఇంకా బాధ అనిపించింది. హమ్‌ జబర్దస్తీ నయ్‌ జా సక్తేనా (బలవంతంగా వెళ్ళి అడగలేనుగా). పిలవకపోవడానికి బలమైన కారణం ఉండే ఉంటుందేమో! అది ఆయనకే వదిలేద్దాం. అయినా గానీ రాజమౌళి నాకు ఎప్పటికీ గాడ్‌ ఫాదరే. భవిష్యత్తులో ఎప్పటికైనా మళ్ళీ ఆయన చిత్రంలో నటించాలని ఉంది. ఒక మంచి జానపద లేదా చారిత్రక చిత్రం నిర్మించాలనీ, అందులో నటించాలనీ నాకో బలమైన కోరిక. అది తప్పక నెరవేరాలని ఆ భగవంతుణ్ణి కోరుకుంటున్నాను.
 
టాలీవుడ్‌ అంటే ఎంతో గౌరవం
తెలుగు చిత్ర పరిశ్రమను నేనెంతో గౌరవిస్తాను. హిందీలో కంటే తెలుగులోనే నాకు ఎక్కువ పేరు వచ్చింది. తెలుగు దర్శకులు, తెలుగు నిర్మాతలు, ప్రేక్షకులు అందరూ నా కెరీర్‌ అభివృద్ధికి ఎంతో సహకరించారు. నేను అనుకున్న లక్ష్యం నెరవేరింది. నాకు నేమ్‌ అండ్‌ ఫేమ్‌ రావడానికి తెలుగు చిత్ర పరిశ్రమే ముఖ్యకారణం. తెలుగు పరిశ్రమ ఇచ్చినంత గౌరవం మరెవ్వరూ నాకు ఇవ్వలేదు. తెలుగు ఇండస్ర్టీ లైక్‌ మై గాడ్‌ మదర్‌.
ప్రస్తుతం జూనియర్‌ ఎన్‌.టి.ఆర్‌ తో ‘జై లవకుశ’ లో చేస్తున్నాను. ఇందులో నాది విభిన్నమైన పాత్ర. రానా చిత్రంలో కూడా చేస్తున్నాను. ఇంకా పేరు పెట్టలేదు. మరో రెండు చిత్రాలకోసం దర్శకులతో సంభాషణలు జరుగుతున్నాయి.
 
తెలుగువారి ఇడ్లీ ఇష్టం
ఆంధ్రా ఇడ్లీ సాంబార్ అంటే నాకెంతో ఇష్టం. దాంతోపాటు దోశ, వడ, ఉప్మా ఇంకా చాలా ఇష్టం. మా ముంబయిలో ఇవన్నీ అంతగా దొరకవు. ఇంకా చెప్పాలంటే ఆంధ్రా పొంగల్‌, రసం అంటే మరీ ఇష్టం. మనం అభిమానించే నటులు కాలానుగుణంగా మారుతూ ఉంటారు. ప్రస్తుతం రణవీర్‌సింగ్‌, దీపికాపడుకునే హిందీ లో నా అభిమాన నటులు. అంతకుముందు ఆల్‌రౌండర్‌ అమితాబచ్చన్‌ అంటే బాగా ఇష్టం.
నా భార్య పేరు కల్యాణి. కల్యాణీప్రదీప్‌ రావత్‌ అన్నమాట. మాకు ఒక అబ్బాయి. వాడిపేరు విక్రమాదిత్య.
 
ఓడ పైనుండి సముద్రంలో పడిపోయా
నేను, వినోద్‌ఖన్నా నటించిన హిందీ చిత్రం ‘మహాసంగ్రామ్‌’. ఫైట్‌ సీన్‌ చిత్రీకరణ ఒక ఓడలో చేశాం. వినోద్‌ఖన్నా నన్ను కొట్టుకుంటూ వచ్చే సీన్‌లో ఓడ చివరకు రాగానే నేను తప్పించుకోవాలి. కానీ నేను ఓడ పైనుండి సముద్రంలో పడిపోయాను. నాకు బాగా ఈత వచ్చుగానీ, స్విమ్మింగ్‌పూల్‌లో కొట్టే ఈతవేరు. నదిలో ఈత వేరు. ఇవన్నీ సముద్రంలో అస్సలు పనిచేయవు. అలలు ఎగసిపడుతూ ఉంటాయి. కెరటాలు విసిరికొడతాయి. దురదృష్టం కొద్దీ సముద్రంలో పడి సుడిగుండంలో చిక్కుకున్నాను. ఓడ రౌండ్‌ రౌండ్‌గా తిరుగుతూ ఉండటం ఇవన్నీ క్షణాల్లో జరిగాపోయాయి. ఏం చేయాలో అర్థం కాలేదు. ఓడ కింద ఉన్న ఇంజను నా తగిలేదేగానీ, అక్కడ ఒక రాడ్‌ సపోర్టు నాకు దొరికింది. ఆ రాడ్‌ గట్టిగా పట్టుకుని కేకలు పెడుతూ అక్కడే ఉన్నాను. ఓడ పైకి నన్ను లాగడం సాధ్యంకాదు. చాలా పెద్ద ఓడ. జాలర్లు నా అరుపులు విని నా దగ్గరకు వచ్చారు. వెంటనే ఓడ పై నుండి సేఫ్టీ ఫ్లోటింగ్‌ ట్యూబ్స్‌, తాళ్ళు జాలరులకు ఓడ పైనుంచి అందించారు. వాళ్ళు ఆ తాళ్ళు నా దగ్గరకు విసిరి సేఫ్టీ ట్యూబ్ కూడా అందించారు. వెంటనే ఆ ట్యూబ్‌లోకి దూరి తాడు పట్టుకున్నాను. జాలరులు ఎలాగో నన్ను లాగి నా ప్రాణాలు రక్షించారు. నిజంగా అదొక మరపురాని సంఘటన.
 
బాలీవుడ్‌లో ఎంతో మోసపోయా
ఆ రోజుల్లో షూటింగులకు వెళ్ళడమేగానీ పారితోషికం సరిగ్గా ఉండేదికాదు. ‘పుకట్‌మే కామ్‌కర్‌నా పడతా థ ’ అన్నట్టే ఉండేది. డబ్బు లేకుండానే చేయాల్సివచ్చేది. అలా ఎంతో మోసపోయాను. ఇలా చేస్తేనే నీకు మంచిపేరు వస్తుంది అని దర్శక నిర్మాతలు నన్ను బుజ్జగించేవారు. పనిమాత్రం బాగా చేయించుకునేవారు. ముఖ్యంగా హిందీ సినిమారంగంలో ఇప్పుడైతే పేరు వచ్చింది. ఇప్పుడు మేం ఎంత అడిగితే అంత ఇవ్వడానికి సిద్ధంగా ఉన్నారు. కానీ ఎతైనా ఇస్తారుకదా అని రెచ్చిపోయి డిమాండ్‌ చేయను. దర్శక నిర్మాతలను, కథను దృష్టిలో పెట్టుకుని పారితోషికం అడుగుతాను. పేరు రాకముందు ఒకలాగా, పేరు వచ్చిన తర్వాత మరోలాగా ఉండేది. ముఖ్యంగా ఈ దోపిడీ హిందీ చిత్రరంగంలో బాగా ఉంది. అందుకే హిందీ తారలంతా తెలుగు, తమిళ, కన్నడ చిత్రాలవైపు మొగ్గుచూపిస్తున్నారు. ఈ ధోరణి ఇప్పటికీ ఉంది. ఈ పరిస్థితిలో మార్పు రావాలి.