Jul 18 2016 @ 12:00PM

ఈనాటి చిత్రాల వల్ల అన్నెంపున్నెం ఎరుగని ఆడపిల్లలు ఆహుతైపోతున్నారు

సంగీత సరస్వతి, వెండితెర గాయని రావు బాలసరస్వతిదేవి. ఏడు దశాబ్దాలకు పైగా తన మృదుమధుర స్వరంతో తెలుగు ప్రేక్షకులకు స్వరాభిషేకం చేసిన అద్భుత నటి. పలు భాషల్లో రెండు వేల పాటలు పాడటమే కాదు, పాడుతూ నటించిన పాతతరం నటి. ఈనాటి చిత్రాల వల్ల అన్నెంపున్నెం ఎరుగని ఆడపిల్లలు ఆహుతైపోతున్నారని, నేటి చిత్రాల్లో ఓవర్‌ యాక్షన్‌ ఎక్కువైందనీ, హాస్యం అపహాస్యం పాలవుతోందనీ ఆవేదన వ్యక్తం చేస్తున్న బాలసరస్వతిదేవి ఇంటర్వ్యూ......

నా జన్మస్థలం మద్రాసు. మా తాతగారు మద్రాసు హైకోర్టులో న్యాయవాద వృత్తి చేసేవారు. నేను ఎక్కువ చదువుకోలేదు. గుంటూరులో మాకు రత్న మహల్‌ అని సినిమా థియేటర్‌ ఉండేది. దాంతో మా తాతగారు తప్ప 1934లో మా కుటుంబం గుంటూరు తరలి వచ్చింది. ఇప్పుడు నా వయసు 87 సంవత్సరాలు.
 
సంగీతమే నా చదువు
మా ఇంటి వాతావరణ ప్రభావంవల్ల పసితనం నుండే సంగీతంలో మెళకువలు తెలుసుకునేదాన్ని. బాల్యం నుండీ సంగీతమే నా చదువు. ఒక ఆంగ్లో ఇండియన్‌ లేడీ నా ట్యూటర్‌. ఆమె దగ్గరే నా చదువంతా. ఆవిడే నాకు లోకజ్ఞానం నేర్పుతూ ఉండేది. కొంతకాలం కర్ణాటక సంగీతం నేర్చుకున్నాను. నాన్నగారు ఎంతోశ్రద్ధగా బొంబాయి తీసుకెళ్ళి వసంత దేశాయ్‌ దగ్గర హిందూస్థానీ సంగీతం నేర్పించారు. ఆ విధంగా 1940 నాటికి సంగీతంలో ప్రావీణ్యం సంపాదించాను. అదే సమయంలో గూడవల్లిగారి చిత్రంలో నటించాను.
 
నాన్న కల
మంచి గాయనిగా నేను పేరు సంపాదించుకోవాలన్నది మా నాన్నగారి కల. పైగా ఆయన కర్నాటక సంగీతంలో దిట్ట. హార్మోనియం వాయిస్తూ పాటలు పాడేవారు. పట్టుదలగా, ఆరేళ్ళ వయసు నుండే నాకు సంగీతం నేర్పించేవారు. కానీ నాకు చదువుమీద ఆసక్తి ఎక్కువ.
 
హెచ్‌ఎంవి లో పాటల రికార్డింగ్‌ 
గుంటూరులో మా సినిమా థియేటర్‌ను 1936లో నాటకరంగ స్థలంగా మార్చేశాం. అక్కడే మేం ఎన్నో నాటకాలు ప్రదర్శించేవాళ్ళం. ఆ నాటకాల్లో పాటల సన్నివేశాలు వచ్చినప్పుడు నేను నేపథ్యగానం అందించేదాన్ని. అలా నేను పాటలు పాడుతున్నప్పుడు హెచ్‌.ఎం.వి. గ్రాంఫోన్‌ రికార్డ్స్‌ కంపెనీవారు విని, నాకు తెలియకుండానే నా వాయిస్‌ రికార్డ్‌ చేసుకెళ్ళారు. హెచ్‌.ఎం.వి. రిప్రజెంటేటివ్‌ కొప్పరపు సుబ్బారావుగారు వచ్చి నా పాటలు రికార్డింగ్‌కి నాన్నగారితో ఒప్పందం చేసుకున్నారు. అలా మొదటిసారి ‘‘పరమ పురుషా పరంధామా......’’ అనే పాట, ‘‘దొరికె దొరికె నీ దర్శనము...’’ మరోపాట, రెండు సోలో సాంగ్స్‌ పాడాను. నాకు మంచి పేరు వచ్చింది. ప్రఖ్యాత సంగీత విద్యాంసులు బాలమురళీకృష్ణగారు తన పదవయేట సంగీతంలో ప్రవేశిస్తే, నేను నా ఆరవ యేటనే సంగీత ప్రావీణ్యం సంపాదించుకున్నా.
 
తొలి పాట, నటనకు 200 పారితోషికం
హెచ్‌.ఎం.వి. ద్వారా నా పాటలన్నీ విని సి.పుల్లయ్యగారు ‘సతీ అనసూయ’ చిత్రంలో అవకాశమిచ్చారు. అప్పుడు నా వయసు ఏడేళ్ళు. ఆ విధంగా నేను 80 యేళ్ళ క్రితం నా మొదటి చిత్రంలో నటించాను. 200 రూపాయలు పారితోషికం ఇచ్చారు. ఈ చిత్రంలో గంగ పాత్రలో పాడుతూ నటించాను. కవి బలిజేపల్లి లక్ష్మీకాంతంగారి ‘‘ఏది దారి నాకిచట ఈ కలుష భూతములపాలైతిని....’’ అనేది ఈ సినిమాలో నేను పాడిన పాట. ఆకుల నరసింహారావుగారు సంగీతం. చిన్న వయసులో సినిమా పాటపాడి గాయనిగా, నటిగా అందరి ప్రశంసలు అందుకున్నాను. 1936 లో విడుదలైన ఈ చిత్రంలో 60 మంది చిన్నపిల్లలు నటించడమే ఒక ప్రత్యేకత! ప్రేక్షకులు బాగా ఆదరించారు.
 
భక్త కుచేల, బాలయోగిని
మద్రాసులో సౌకర్యాలు లేని రోజుల్లో (1934-40) తమిళ, తెలుగు చిత్రాల నిర్మాణం ఎక్కువ బొంబాయి, కలకత్తాల్లోనే. అలా కె.సుబ్రహ్మణ్యంగారి దర్శకత్వంలో కలకత్తా ఈస్ట్‌ ఇండియా స్టూడియోలో ‘భక్త కుచేల’ తమిళ చిత్ర నిర్మాణం మూడు నెలల్లో పూర్తి చేశారు. కృష్ణస్వామి ప్రొడ్యూస్‌ చేశారు. లిరిక్‌ రైటర్‌ పాపనాశం శివన్‌ కుచేలుడుగా , భార్యగా యస్‌.డి.సుబ్బలక్ష్మి నటించారు. కృష్ణుడి పాత్ర కూడా ఆవిడదే. ఇందులో నాది బాలకృష్ణుడి పాత్ర. నా పాటకు, నటనకు 500 పారితోషికం ఇచ్చారు. ఇది కూడా 1936లో విడుదలై విజయవంతమైంది. ‘బాలయోగిని’ తమిళ చిత్రంలో నాది టైటిల్‌ పాత్ర. ఈ చిత్రంతోనే నా పేరు ముందు బాల అని చేర్చి బాలసరస్వతీదేవిగా మార్చారు. ఇక అప్పటి నుంచీ ఆ పేరే నాకు స్థిరపడిపోయింది. మూడు నెలల్లోనే నిర్మాణం పూర్తిచేసి 1937 లో విడుదల చేశారు. విజయవంతంగా ఆడింది. కె.ఆర్‌.చేలమ్‌, బేబిసరోజ, సి.వి.వి. పంతులు, కె.బి.వత్సల తదితరులు నటించారు. నాకు 1500 పారితోషికం ఇచ్చారు.
 
గూడవల్లిగారి ‘ఇల్లాలు’
గూడవల్లి రామబ్రహ్మంగారి ‘ఇల్లాలు’ చిత్రంలో నేను నటించాను. ఆ రోజుల్లో అద్భుతమైన వసూళ్ళతో విజయఢంకా మోగించింది. తమిళ చిత్రాల్లో నటించడం వల్ల అందరూ నన్ను తమిళ అమ్మాయి అనుకునేవారు. అరవ అమ్మాయి తెలుగుపాటలు పాడగలదా? అని అనుమానం వ్యక్తం చేసేవారు. నేను తెలుగు అమ్మాయినని, చక్కటి పాటలు పాడగలననీ తెలిశాక, సంగీత దర్శకుడు రాజేశ్వరరావుగారు పిలిచి నాతో పాటలు పాడించారు. ఈ చిత్రంలో ఆయన, నేను ఎవరిపాట వారు పాడుకుని జతగా నటించాం. ఆయనతో నటించడం తల్చుకుంటే నిజంగా ఎంతో సంతోషం కలుగుతుంది. బసవరాజు అప్పారావుగారు పాటలు రాశారు. ఇందులో ఉమామహేశ్వరరావు, కాంచనమాల హీరోహీరోయిన్లు.
 
ద్విభాషాచిత్రం భక్తతుకారాం
కోయంబత్తూరు సెంట్రల్‌ స్టూడియోస్‌ వారు తెలుగు, తమిళభాషల్లో ‘భక్తతుకారాం’ నిర్మించారు. ఈ చిత్రానికి ఆరుగురు దర్శకులు! ఒకరితరువాత ఒకరు వదిలిపెట్టి వెళ్ళిపోయారు. ఆరో ఆయన పూర్తిచేశారు. సంగీత కళాశాల ప్రిన్సిపాల్‌ ముసిరి సుబ్రహ్మణ్యం అయ్యర్‌ తమిళంలోనూ, సిఎ్‌సఆర్‌ ఆంజనేయులు గారు తెలుగులోనూ తుకారాం పాత్రలు ధరించారు. జిజియాబాయి పాత్రలో సురభి కమలాబాయి, నేను తుకారాం కూతురుగా చేశాం. రెండు భాషల్లోనూ 1941-42లో ఒకేసారి విడుదలై విజయవంతంగా ఆడాయి. నేను ఈ రెండు చిత్రాల్లో పాటలు పాడాను.
 
డాన్సింగ్‌ గర్ల్‌
ఇంగ్లీష్‌ టైటిల్‌ ఉన్న తమిళ భక్తి ప్రధాన చిత్రం! ఎల్లిస్సార్‌ డంకన్‌ దర్శకత్వంలో ‘డాన్సింగ్‌ గర్ల్‌’ బొంబాయిలో నిర్మించారు. నేను హీరోయిన్‌. దాసి పిల్ల పాత్ర. ఎస్‌.రాజేశ్వరరావుగారి సంగీత దర్శ కత్వంలో పాటలన్నీ నేనే పాడాను. ఎం.జి.రామచంద్రన్‌ శివుడు. 1940-43లో మూడేళ్ళపాటు నిర్మించారు.
 
కోలంక రాజా వారితో వివాహం
1944 నాటికి మేం తిరిగి మద్రాసు చేరుకున్నాం. ఒకసారి మా అత్తయ్య, మావయ్యలతో మద్రాసు గిండిలో గుర్రపు రేసులు చూడ్డానికి వెళ్ళాను. అప్పటికి నా వయసు 15 సంవత్సరాలు. వెంకటగిరి మహారాజాగారి నాలుగవ కుమారుడు ప్రద్యుమ్న, కృష్ణ, సూర్యారావు కూడా అక్కడికి వచ్చారు. ఆయన కోలంక రాజావారు. వారి గుర్రాలు కూడా ఈ రేసుల్లో ఉండేవి. అక్కడ నన్ను చూసి, నేను పాటలు బాగా పాడతాననీ, సినిమాల్లో నటిస్తాననీ తెలుసుకున్నారు. కొన్నాళ్ళకు వాళ్ళందరూ మద్రాసు వచ్చారు. ‘మీ పాటలు వినాలని వచ్చాం, వినిపిస్తారా?’ అన్నారు. వాళ్ళు వచ్చింది పెళ్ళిచూపులకే అని నాన్నగారికి అర్థమైంది. మీ అమ్మాయి నచ్చింది, చేసుకుంటాం అన్నారు. నాన్నగారు నన్నే అడగమన్నారు. రాజావారు అడిగినప్పుడు కాదనలేం. ఆయనకు నాకూ దాదాపు 19 సంవత్సరాలు తేడా! కానీ ఆ రోజుల్లో అలాంటివి పట్టించుకునేవారు కాదు. అలా 1944లో కోలంక రాజావారితో నా వివాహం జరిగింది.
 
రాజావారికి తెలియకుండా సినిమాల్లో పాడాను
నా జీవితంలో మరువలేని సంఘటన మా వారికి తెలియకుండా సినిమాల్లో ఎన్నో పాటలు పాడాను. కారణం ఏమిటంటే, నా సినీ జీవితం యధాతథంగా సాగుతుందని వివాహానికి ముందు నాకు మా వారు మాట ఇచ్చారు. కానీ ఒకరోజు పత్రికల్లో నా హిట్‌ సాంగ్స్‌, నా నటన గురించి ఫోటోతో సహా రాశారు. పత్రికల్లో నా గురించి రావడం రాజావారికి నచ్చలేదు. నన్ను పాడటం, నటించడం మానేయమన్నారు. అలా అభ్యంతరం పెట్టకుండా ఉంటే నా జీవితం మరో మలుపు తిరిగి ఉండేది. కానీ నేను పుట్టింటికి వచ్చినప్పుడల్లా, ఇండస్ర్టీ బాధపడకూడదని, వారు నష్టపోకూడదనీ, వారిని సంతోషపరచడమే నా విధిగా భావించి చాలా పాటలు మా వారికి తెలియకుండా పాడాను. నా కెరీర్‌లో తెలుగు, తమిళ, కన్నడ, మలయాళ, సింహళ భాషల్లో రెండువేల పాటలు పాడాను. ఎన్నో చిత్రాల్లో నటించాను. స్వప్నసుందరి, పిచ్చిపుల్లయ్య, పెళ్ళిసందడి, శాంతి, షావుకారు, దేవదాసు, లైలామజ్ను, భాగ్యలక్ష్మి, మంచిమనసుకు మంచిరోజులు.. చిత్రాల్లో ఘంటసాల, ఏ.ఎం.రాజా, సౌందర్‌రాజన్‌, పిఠాపురం నాగేశ్వరరావు, ఎస్‌.రాజేశ్వరరావు, జిక్కి, ఏ.పి.కోమల, వైదేహి, ఎం.ఎ్‌స.రాజేశ్వరి లాంటి వారితో కలిసి పాడాను. నేను పాడిన ఆఖరి పాట ‘సంఘం చెక్కిన శిల్పాలు’ చిత్రంలో, ‘పోయిరావమ్మ అత్తవారింటికి అపరంజిబొమ్మ....’.
 
రేడియోలో పాటలు
1944లో మద్రాసు ఆకాశవాణి రేడియో కేంద్రంలో, 1948లో విజయవాడ ఆకాశవాణి కేంద్రం కూడా నా లలిత సంగీత కార్యక్రమంతోనే ప్రారంభమయ్యాయి. ఇందుకు నేనెంతో గర్వపడుతున్నాను. ప్రసిద్ధ సంగీత దర్శకులు ఎస్‌.రాజేశ్వరరావుగారితో కలిసి 1940-50 మధ్య కాలంలో ఎన్నో లలిత గీతాలు ఆలపించాను. దేవులపల్లి కృష్ణశాసి్త్ర, బసవరాజు అప్పారావు, ఆరుద్ర, ఇంద్రగంటి హనుమ చ్ఛాసి్త్ర, బాలాంత్రపు రజనీకాంతరావులు రచించిన ఎన్నో గేయాలు రేడియోలో పాడాను. అప్పట్లో నా ‘రాధామాధవం’ సీడీ శ్రోతలను అలరించింది.
 
నిజంగా తాగి నటిస్తున్నారేమో!
ఇప్పటి చిత్రాల గురించి నేను చెప్పాల్సిన అవసరం లేదు. సినిమా పేర్లే డబుల్‌ మీనింగ్స్‌తో వస్తున్నాయి. భాష కూడా అంతే! డైలాగ్స్‌ సంగతి సరేసరి. ‘ఓవర్‌ యాక్షన్‌’ ఎక్కువైంది. హాస్యం అపహాస్యం పాలవుతోంది. వేషధారణ దిగజారింది. హింసనే ఎక్స్‌పోజ్‌ చేస్తున్న ఈ చిత్రాల వల్ల లేతవయసు పిల్లలు చెడిపోతున్నారు. అన్నెంపున్నెం ఎరుగని ఆడపిల్లలు ఆహుతైపోతున్నారు. మద్యం తాగే సన్నివేశాల్లో నిజంగా తాగి నటిస్తున్నారేమో? అనిపిస్తోంది. కనుక తీవ్రమైన మార్పులు రావాలి. యువతకు, పిల్లలకు తోడ్పడే చిత్రాలు నిర్మించాలి. నటులు కూడా కథ చూసుకుని నటించాలి.
-కె.హరనాథ్‌, సెల్‌: 97035 42598