జాతీయ కబడ్డీ పోటీలకు కడ్తాల ఆశ్రమ పాఠశాల విద్యార్థి
ABN , Publish Date - Nov 12 , 2024 | 12:14 AM
జాతీయ స్థాయి కబడ్డీ పోటీలకు కడ్తాల మండలం మైసిగండి గిరిజన ఆశ్రమ పాఠశాల విద్యార్థి రాజేందర్‌ ఎంపికయ్యాడు.
కడ్తాల్‌, నవంబరు 11 (ఆంధ్రజ్యోతి): జాతీయ స్థాయి కబడ్డీ పోటీలకు కడ్తాల మండలం మైసిగండి గిరిజన ఆశ్రమ పాఠశాల విద్యార్థి రాజేందర్‌ ఎంపికయ్యాడు. ఈనెల 7 నుంచి 9వ తేదీ వరకు యాదాద్రి భువనగిరి జిల్లాలో జరిగిన 68వ స్కూల్‌ గేమ్స్‌ ఫెడరేషన్‌ అండర్‌ -14 బాలుర రాష్ట్రస్థాయి కబడ్డీ పోటీలలో ఉమ్మడి రంగారెడ్డి జిల్లా జట్టు తరపున 9వ తరగతి చదువుతున్న రాజేందర్‌ పాల్గొని ప్రతిభ కనబరిచాడు. దీంతో అతన్ని జాతీయ స్థాయి పోటీలకు ఎంపిక చేసినట్లు ఆశ్రమ పాఠశాల సంక్షేమ అధికారి బాలరాజ్‌ తెలిపారు. ఈ సందర్భంగా సోమవారం కడ్తాల విద్యాశాఖ కార్యాలయంలో అభినందన కార్యక్రమం నిర్వహించారు. ఎంఈవో సత్యనారాయణ, ఉపాధ్యాయులు రాజేందర్‌ను పూలమాలలు, శాలువాలతో సత్కరించారు. జంగయ్య, బాలరాజు, భీముడు, మహ్మద్‌ సాబేర్‌, మంజుల ఉన్నారు.
