అంబులెన్స్‌లో గంజాయి రవాణా

రూ.2 కోట్ల విలువైన 4 క్వింటాళ్ల సరుకు పట్టివేత

టైర్‌ పంక్చర్‌ కావడంతో బయటపడ్డ గుట్టు

చుంచుపల్లి, సెప్టెంబరు 15: పోలీసులకు చిక్కకుండా గుట్టుగా గంజాయి రవాణా చేసేందుకు అక్రమార్కులు రకరకాల ఎత్తులు వేస్తున్నారు. ఇందులో భాగంగానే ప్రాణాపాయంలో ఉన్నవారిని ఆస్పత్రికి తరలించే అంబులెన్స్‌ను కూడా గంజాయి రవాణాకు వాడేశారు. అయితే, ఆ వాహన టైరు పంక్చర్‌ కావడంతో రూ.కోట్లు విలువ చేసే గంజాయి గుట్టురట్టయింది. అంబులెన్స్‌లో గంజాయి తరలిస్తున్న ఘటన కొత్తగూడెంలో వెలుగు చూసింది. ఓ అంబులెన్స్‌ టైర్‌ పంక్చర్‌ కావడంతో కొత్తగూడెంలోని రామవరం ప్రాంతంలో శనివారం అర్ధరాత్రి నిలిచిపోయింది. అంబులెన్స్‌ ఆగిపోవడంతో గమనించి సాయం చేసేందుకు ముందుకొచ్చిన స్థానిక యువకులు.. వాకబు చేయగా పరిస్థితి అనుమానాస్పదంగా కనిపించింది. దీంతో ఆ యువకులు ఇచ్చిన సమాచారంతో అక్కడికి చేరుకున్న పోలీసులు అంబులెన్స్‌లోని వ్యక్తిని ప్రశ్నించారు. వాహనానికి తమిళనాడు రిజిస్ట్రేషన్‌ నెంబర్‌ ప్లేట్‌ ఉండడంతో ఎక్కడి నుంచి ఎక్కడి వెళుతున్నారని ? లోపల ఎవరున్నారని ? అడిగారు. సదరు వ్యక్తి తడబడడంతో అనుమానించి వాహనంలో తనిఖీ చేయగా... నాలుగు క్వింటాళ్ల గంజాయి దొరికింది. దీంతో నివ్వెరపోయిన పోలీసులు.. అంబులెన్స్‌, అందులోని వ్యక్తిని పోలీ్‌సస్టేషన్‌కు తరలించారు. పట్టుబడిన గంజాయి విలువ రూ.రెండు కోట్ల వరకు ఉంటుందని సమాచారం. కేసు దర్యాప్తు కొనసాగుతోంది.