Chennai Gangster: బాంబు తయారు చేస్తుండగా పేలుడు.. రెండు చేతులు కోల్పోయిన గ్యాంగ్స్టర్
ABN , First Publish Date - 2023-02-05T19:31:58+05:30 IST
నాటు బాంబు(Crude Bomb) తయారు చేస్తుండగా ప్రమాదవశాత్తు పేలడంతో
చెన్నై: నాటు బాంబు(Crude Bomb) తయారు చేస్తుండగా ప్రమాదవశాత్తు పేలడంతో ఓ గ్యాంగ్స్టర్(Gangster) రెండు చేతులు కోల్పోయాడు. తమిళనాడు రాజధాని చెన్నైలో జరిగిందీ ఘటన. గ్యాంగ్స్టర్ ప్రస్తుతం ఆసుపత్రిలో చికిత్స పొందుతున్నాడు. సమాచారం అందుకున్న పోలీసులు ఈ ఘటనపై కేసు నమోదు చేసుకుని దర్యాప్తు ప్రారంభించారు.
అతడు చికిత్స పొందుతున్న ఆసుపత్రికి వెళ్లి దర్యాప్తు ప్రారంభించారు. చెన్నైకి చెందిన కరుడుగట్టిన గ్యాంగ్స్టర్ ఒట్టెరి కార్తి పుళల్ జైలులో ఉన్నప్పుడు విజయ్ కుమార్ అనే మరో నేరస్థుడితో పరిచయం ఏర్పడింది. ఈ క్రమంలో రెండు రోజుల క్రితం అంబత్తూరులోని అరగడం సమీపంలో కుక్కపిల్లను కొనుగోలు చేసే నెపంతో విజయ్కుమార్ వద్దకు వెళ్లాడు.
విజయ్ కుమార్ ఇంటికి వచ్చిన కార్తి ఆయన ఇంటిపై నాటు బాంబు తయారు చేయడం మొదలుపెట్టాడు. ఈ క్రమంలో ప్రమాదవశాత్తు ఓ బాంబు పేలడంతో కార్తి తీవ్రంగా గాయపడ్డాడు. వెంటనే అతడిని ఆసుపత్రికి తరలించారు. చేతులు పూర్తిగా ఛిద్రం కావడంతో తీసేయాలని వైద్యులు నిర్ణయించారు. అతడి కాళ్లకు కూడా తీవ్ర గాయాలైనట్టు పోలీసులు తెలిపారు.
సమాచారం అందుకున్న పోలీసులు వెంటనే ఘటనా స్థలానికి చేరుకుని పరిశీలించారు. ఆపై ఆసుపత్రికి వెళ్లి వివరాలు సేకరించారు. బాంబు తయారీ వెనక ఉన్న కారణంపై ఆరా తీస్తున్నారు.