నాపరాతి అక్రమ తవ్వకాలపై కొరడా

యంత్రాలను సీజ్‌ చేసిన రెవెన్యూ అధికారులు

తాండూరు రూరల్‌, నవంబరు, 29 : నాపరాతి అక్రమ తవ్వకాలపై అధికారులు కొరడా ఝుళిపించారు. తాండూరు మండల పరిధిలోని సంగెంకలాన్‌, కోటబాస్పల్లి, మల్కాపూర్‌ గ్రామాల్లో ప్రభుత్వ భూముల్లో అక్రమ తవ్వకాలు జోరుగా సాగుతున్నాయి. అక్రమంగా విద్యుత్‌ కనెక్షన్లు తీసుకుని గనుల తవ్వకాలు జరుగుతున్నాయి. విషయం తెలుసుకున్న తాండూరు తహసీల్దార్‌ చిన్నప్పలనాయుడు మంగళవారం సిబ్బందిని తనిఖీలు చేయాలని ఆదేశించారు. ఈమేరకు ఆర్‌ఐ రాజిరెడ్డి సిబ్బందితో కలిసి తనిఖీలు చేశారు. ఇందులో భాగంగా మల్కాపూర్‌ సహకార సంఘం సొసైటీ పరిధిలోని ప్రభుత్వ భూమిలో అక్రమంగా తవ్వకాలు జరపుతుండటంతో పనులు నిలిపివేసి యంత్రాలను సీజ్‌ చేశారు. ఎలాంటి అనుమతులు లేకుండా ప్రభుత్వ భూముల్లో చేపడుతున్న తవ్వకాలను నిలిపేసి యంత్రాలను అక్కడి నుంచి తరలించినట్లు చెప్పారు.