అనుమతులొచ్చాయి
ABN , First Publish Date - 2022-11-20T23:52:39+05:30 IST
జిల్లాలోని జూనియర్ కళాశాలలకు ఎట్టకేలకు ఇంటర్బోర్డు అనుబంధ గుర్తింపు వచ్చింది. జిల్లా పరిధిలో ఉన్న ప్రభుత్వ, ప్రైవేటు కళాశాలల్లో దాదాపు అన్నింటికి ఇంటర్బోర్డు 2022-23 విద్యాసంవత్సరానికి అనుబంధ గుర్తింపును ఇచ్చింది.
మెదక్ జిల్లాలో 60 జూనియర్ కళాశాలలకు ఇంటర్బోర్డు అనుబంధ గుర్తింపు
మెదక్ అర్బన్, నవంబరు 20: జిల్లాలోని జూనియర్ కళాశాలలకు ఎట్టకేలకు ఇంటర్బోర్డు అనుబంధ గుర్తింపు వచ్చింది. జిల్లా పరిధిలో ఉన్న ప్రభుత్వ, ప్రైవేటు కళాశాలల్లో దాదాపు అన్నింటికి ఇంటర్బోర్డు 2022-23 విద్యాసంవత్సరానికి అనుబంధ గుర్తింపును ఇచ్చింది. దీంతో కొద్ది రోజులుగా అనుమతులపై ఆందోళనతో ఉన్న యాజమాన్యాలు ఊపిరి పీల్చుకున్నాయి. మెదక్ జిల్లావ్యాప్తంగా 65 జూనియర్ కళాశాలలు ఉండగా 60 కళాశాలలకు బోర్డు అనుబంధ గుర్తింపు లభించిందని ఇంటర్ జిల్లా నోడల్ అధికారి సత్యనారాయణ తెలిపారు.
లోపాలమయంగా కాలేజీలు
జిల్లాలో ప్రైవేటు జూనియర్ కళాశాలల్లో అనేక లోపాలున్నాయి. అనుమతి ఒకచోట తీసుకొని కళాశాలను మాత్రం మరోచోట నడుపుతున్నారు. అగ్నిమాపకశాఖ అనుమతి లేకపోవడం, సౌకర్యాలు సరిగ్గా లేపోవడంతో ప్రభుత్వం కళాశాలలకు అనుమతి నిరాకరించింది. పలు కాలేజీల్లో అధ్యాపకులు అందుబాటులో లేకపోవడం, నీరు, మౌలిక వసతులు లేకపోవడం కూడా అనుమతుల్లో జాప్యానికి కారణం. అద్దె భవనాల్లో కొనసాగుతున్న కళాశాలల్లో అసౌకర్యాలు కనిపిస్తున్నాయి. పలు కళాశాలలు పరిమితికి మించి విద్యార్థులతో కొనసాగుతున్నాయి.
రెండు నెలలుగా ఎదురుచూపులు
ఇంటర్మీడియట్ బోర్డు నిబంధనల ప్రకారం 2022-23 విద్యా సంత్సరానికి అనుమతుల జారీ కోసం జిల్లావ్యాప్తంగా ఉన్న కళాశాల్లో అధికారులు రెండు నెలల కిత్రం తనిఖీలు నిర్వహించి వివరాలు ఆన్లైన్లో నమోదు చేశారు. చాలా ప్రైవేట్ కళాశాలలు బహుళ అంతస్తుల భవనాల్లో నిర్వహిస్తుండడంతో వాటికి అగ్నిమాపకశాఖ నుంచి ఎన్ఓసీ లేకపోవడం వంటి కారణాలతో బోర్డు ఇప్పటి వరకు అనుబంధ గుర్తింపు ఇవ్వలేదు. గుర్తింపు వస్తుందనే ధీమాతో కళాశాలల్లో విద్యార్థులను చేర్చుకున్నా ఇంటర్ బోర్డు మాత్రం విద్యార్థుల వివరాలను ఆన్లైన్లో నమోదు చేయడానికి కళాశాలలకు లాగిన్ ఐడీ ఇవ్వలేదు. దీంతో విద్యార్థుల పేర్లను నమోదు చేయలేదు. తాజాగా సర్కార్ అన్ని కళాశాలలకు షరుతులతో కూడిన అనుబంధ గుర్తింపున్విడంతో వీరంతా ఊపిరి పీల్చుకున్నారు.
ఐదు కాలేజీలకు త్వరలో అనుమతులు : సత్యనారాయణ, ఇంటర్ నోడల్ అధికారి
జిల్లావ్యాప్తంగా 65 జూనియర్ కళాశాలున్నాయి. ఇప్పటి వరకు 60 కళాశాలలకు అనుబంధ గుర్తింపు వచ్చింది. మిగిలినవాటికీ త్వరలో పర్మిషన్ వచ్చే అవకాశముంది. ఈనెల 30 వరకు విద్యార్థులు అపరాద రుసుం లేకుండా పరీక్ష ఫీజు చెల్లించవచ్చని ఇంటర్బోర్డు ఆదేశాలు జారీ చేసింది.