ఆటిజంపై NATS వెబినార్‌కు చక్కటి స్పందన!

ABN , First Publish Date - 2022-05-03T23:04:54+05:30 IST

అమెరికాలో తెలుగువారి కోసం అనేక కార్యక్రమాలు చేపడుతున్న ఉత్తర అమెరికా తెలుగు సంఘం నాట్స్ తాజాగా ఆటిజం మీద వెబినార్ నిర్వహించింది.

ఆటిజంపై NATS వెబినార్‌కు చక్కటి స్పందన!

మే 1(న్యూజెర్సీ):  అమెరికాలో తెలుగువారి కోసం అనేక కార్యక్రమాలు చేపడుతున్న ఉత్తర అమెరికా తెలుగు సంఘం నాట్స్ తాజాగా ఆటిజం మీద వెబినార్ నిర్వహించింది. ఆటిజం బాధితులు ఎలా ఉంటారు.? చిన్నారుల్లో ఆటిజాన్ని ఎలా గుర్తించాలి..?  వారి పట్ల ఎలా వ్యవహరించాలి..? ఎలాంటి మద్దతు అందించాలి..? చికిత్స ఎలా ఉంటుంది. ఇలా ఆటిజం గురించి అనేక అంశాలపై స్పష్టమైన అవగాహన కల్పించేలా ఈ వెబినార్ సాగింది. ఈ సదస్సులో వర్జీనియా ఆటిజం అడ్వైజరీ కౌన్సిల్ సభ్యుడు, పిల్లల వైద్య నిపుణుడు కృష్ణ మాదిరాజు, పిల్లల మనో వికాస వైద్య నిపుణులు కవిత అరోరా, మీనాక్షి చింతపల్లి, పిల్లల మానసిక వైద్య నిపుణులు రామ్ ప్రయాగ, పేరంట్ అడ్వకేట్స్ శుభ బొలిశెట్టి, రాధ కాశీనాథుని పాల్గొన్నారు. ఆటిజాన్ని ప్రాథమిక దశలోనే ఎలా గుర్తించాలనే విషయాన్ని కృష్ణ మాదిరాజు చక్కగా వివరించారు. ఆటిజంలో ఉండే లక్షణాలను ఆయన స్పష్టంగా వీక్షకులకు తెలిపారు. ఆటిజం బారినపడ్డ పిల్లలకు భరోసా ఇవ్వాల్సిన బాధ్యత వారి తల్లిదండ్రులదేనని కృష్ణ మాదిరాజు స్పష్టం చేశారు. ఆటిజం సమస్య తమ పిల్లలకు ఉందని తెలిసినప్పుడు తల్లిదండ్రులు కృంగిపోకుండా దైర్యంగా ఉండాలని, ఆటిజం చికిత్స విధానాలపై అవగాహన పెంచుకోవాలని తెలిపారు. వైద్యుల సలహాలతో ఆటిజం నుంచి బయటపడే మార్గాలను అన్వేషించాలని కవిత అరోరా అన్నారు. 


ఆటిజం చికిత్స విధానాలపై కూడా ఈ వెబినార్‌లో ప్రముఖ వైద్యులు మీనాక్షి చింతపల్లి, రామ్ ప్రయాగ అవగాహన కల్పించారు. ఆటిజం సమస్యతో ఉన్న తమ వారు దీన్ని అధిగమించేలా చేసేందుకు తాము ఎలాంటి మార్గాలను సూచించామనే విషయాలను  పేరెంట్స్ అడ్వకేట్స్ శుభ బొలిశెట్టి, రాధ కాశీనాథుని పేర్కొన్నారు. ఆటిజం పిల్లల్లో ఉండే ప్రతిభను కూడా వెలికి తీసేలా తల్లిదండ్రులు వ్యవహరించాలని ఈ సందర్భంగా వారు సూచించారు. ప్రముఖ వైరాలజీ వైద్యులు పద్మజ యలమంచిలి ఈ వెబినార్‌కు వ్యాఖ్యతగా వ్యవహరించారు. నాట్స్ ఆశయాలు, లక్ష్యాల గురించి ఈ వెబినార్‌లో నాట్స్ ఛైర్ విమెన్ అరుణ గంటి వివరించారు. ఈ కార్యక్రమానికి జ్యోతి వనం కూడా అనుసంధానకర్తగా వ్యవహరించి తన వంతు తోడ్పాటు అందించారు. ఇంకా జయశ్రీ పెద్దిభొట్ల, ఉమ మాకం ఆటిజంపై ఇంత చక్కటి వెబినార్  నిర్వహించినందుకు నెటిజన్లు నాట్స్‌కు ప్రత్యేక ధన్యవాదాలు తెలిపారు. వెబినార్ నిర్వహణకు సుధీర్ మిక్కిలినేని, లక్ష్మి బొజ్జ టెక్నికల్ సహకారం అందించారు.





Read more