ముంబైని పేల్చేస్తాం

మళ్లీ 2008 తరహా మారణహోమం

పోలీసు కంట్రోల్‌ రూమ్‌కు వాట్సాప్‌ మెసేజ్‌

పాకిస్థాన్‌ నుంచే వచ్చినట్టు నిర్ధారణ

సందేశాల్లో కసబ్‌, జవహరీ పేర్ల ప్రస్తావన

ఆరుగురు ఉగ్రవాదులను రంగంలోకి దించినట్టు వెల్లడి

ముంబై పోలీసులు అలెర్ట్‌.. ఓ వ్యక్తి అరెస్ట్‌

ముంబై, ఆగస్టు 20: దేశవాణిజ్య రాజధాని ముంబైలో 2008 నవంబరు 26న సృష్టించిన మారణహోమాన్ని మరోసారి చేస్తామంటూ ముంబై పోలీసులకు బెదిరింపు సందేశాలు వచ్చాయి. వర్లీలోని పోలీసు కంట్రోల్‌ రూమ్‌ లో ఉన్న ట్రాఫిక్‌ పోలీస్‌ హెల్ప్‌లైన్‌ నంబరుకు వాట్సా్‌పలో శుక్రవారం రాత్రి 11.30 గంటలకు ఈ సందేశాలు వచ్చాయి. ఆ సందేశాలు పంపిన ఫోన్‌ కోడ్‌ పాకిస్థాన్‌కు చెందినదని ముంబై నగర పోలీసు కమిషనర్‌ వివేక్‌ ఫన్‌సల్కర్‌ తెలిపారు. మహారాష్ట్ర తీరానికి కొట్టుకువచ్చిన ఓ పడవలో మూడు ఏకే-47 తుపాకులు, బుల్లెట్లు బయటపడిన తర్వాతి రోజే ఈ హెచ్చరికలు రావడం కలకలం రేపుతోంది. ఈసారి ఉగ్రదాడులకు ఆరుగురిని వినియోగించనున్నట్టు ఒక సందేశంలో పేర్కొనగా, ముంబైని పేల్చేసేందుకు సన్నాహాలు కొనసాగుతున్నాయని మరో సందేశంలో ఉందని ఓ అధికారి చెప్పారు. విరార్‌ నగరంలో ఓ వ్యక్తిని అదుపులోకి తీసుకొని ప్రశ్నిస్తున్నామన్నారు.