వందకు 151 మార్కులు
ABN , First Publish Date - 2022-08-01T08:23:24+05:30 IST
ఓ డిగ్రీ విద్యార్థి బీఏ హానర్స్ పొలిటికల్ సైన్స్ పేపర్లో వందకు 151 మార్కులు సాధించాడు.
బిహార్లోని ఓ వర్సిటీ డిగ్రీ పరీక్షల్లో వింత
దర్భంగా, జూలై 31 : ఓ డిగ్రీ విద్యార్థి బీఏ హానర్స్ పొలిటికల్ సైన్స్ పేపర్లో వందకు 151 మార్కులు సాధించాడు. ఏంటి? వందకు నూట యాభై ఒకటా? అది ఎలా సాధ్యమని షాకయ్యారా ? మీరే కాదు.. తన మార్కు షీట్ చూసుకున్న ఆ విద్యార్థి మీకంటే ఎక్కువగానే బిత్తరపోయాడు. బిహార్, దర్భంగా జిల్లాలోని లలిత్ నారాయణ్ మిథిల విశ్వవిద్యాలయం(ఎల్ఎన్ఎంయూ)లో ఈ వింత జరిగింది. ఆ విద్యార్థి చాయిస్ రాశాడోనో, చేతి రాత బాగుందనో అదనపు మార్కులు వెయ్యలేదు. టైపింగ్ దోషం వల్ల అతని ప్రొవిజనల్ మార్కుషీట్లో మార్కులు తప్పుగా ముద్రణ అయ్యాయి. ఇదిలా ఉండగా, అకౌంట్స్ అండ్ ఫైనాన్స్ పేపర్-4లో సున్నా మార్కులు పొంది పరీక్షల్లో తప్పినఓ బీకామ్ విద్యార్థిని తదుపరి గ్రేడ్కు ప్రమోట్ చేసేశారు. ఈ రెండు విషయాలు తెలిసి ఆ వర్సిటీ విద్యార్థుల్లో ఒకింత కలకలం రేగింది. దీంతో, ఈ రెండు ఘటనలు టైపింగ్ దోషం వల్ల జరిగిన పొరపాట్లని, ఆ విద్యార్థులకు సవరించిన మార్కు షీట్లు అందజేశామని ఎల్ఎన్ఎంయూ రిజిస్ట్రార్ ముస్తాక్ అహ్మద్ వివరణ ఇచ్చుకున్నారు.