చౌడువాడలో పులి సంచారం

- పంజాకు బలైన ఆవు 

కె.కోటపాడు, ఆగస్టు 9: మండలంలోని చౌడువాడలో పులి అలజడి సృష్టించింది. మంగళవారం వేకువజామున ఎదురు అప్పలనర్సకు చెందిన ఆవును  చంపి తినేసింది. అటవీశాఖ అధికారులకు సర్పంచ్‌ దాడి ఎరుకునాయుడు సమాచారం ఇవ్వడంతో వారు వచ్చి పులి దాడి చేసినట్టు గుర్తించారు. నల్లగొండ ప్రాంతాన్ని పులి వదిలి పెట్టడం లేదు. ఎల్లుప్పి  ప్రాంతంలో శనివారం రాత్రి రెండు ఆవులను చంపి మరో గేదెపై దాడి చేసిన విషయం తెలిసిందే. గ్రామాలకు దూరంగా, అడవులకు దగ్గరగా ఉండే పశువుల పాకలపై దాడి చేసి ఆవులను చంపుతోంది. అది మళ్లీ దిశ మార్చుకుని చౌడువాడ వైపు వచ్చింది. రోజుకో మండలంలో తిరుగుతూ అటవీ అధికారులు, ప్రజలకు కంటి మీద కునుకులేకుండా చేస్తోంది. పశువులను గ్రామాలకు దూరంగా ఉంచవద్దని రైతులకు అటవీశాఖ అధికారులు సూచిస్తున్నారు. కాగా పులిని బంధించడంలో అటవీ శాఖ అధికారులు విఫలమవుతున్నారని సర్పంచ్‌ ఎరుకునాయుడు ఆరోపించారు. పశువులను పులి చంపిన తరువాత ఆ ప్రాంతాన్ని సందర్శించి వెళుతున్నారే తప్ప ఎటువంటి చర్యలు తీసుకోవడం లేదన్నారు.