ఆకట్టుకున్న అశ్వాల పారువేట

ABN , First Publish Date - 2022-10-07T05:14:15+05:30 IST

మద్దికెర గ్రామంలో పెద్దనగిరి, చిన్ననగిరి, యమన్ననగిరికి చెందిన యాదవరాజులు విజయదశమి రోజున అశ్వాలపారువేట నిర్వహించడం ఆనవాయితీ. బుధవారం జరిగిన ఈ వేడుక అందరినీ అలరించింది.

ఆకట్టుకున్న అశ్వాల పారువేట
విజయం సాధించిన యమన్ననగిరి అశ్వాన్ని ఊరేగిస్తున్న దృశ్యం

దసరా వేడుకల్లో పదేళ్ల బాలుడి విజయం


మద్దికెర, అక్టోబరు 6: మద్దికెర గ్రామంలో పెద్దనగిరి, చిన్ననగిరి, యమన్ననగిరికి చెందిన యాదవరాజులు విజయదశమి రోజున అశ్వాలపారువేట నిర్వహించడం ఆనవాయితీ. బుధవారం జరిగిన ఈ వేడుక అందరినీ అలరించింది. ఆరుబయటకు వెళ్లే అశ్వాలను ఉదయం గ్రామ శివారులోని భోజప్ప బావికి తీసుకెళ్లి శుభ్రం చేసి తీసుకుని వచ్చారు. సాయంత్రం పెద్దనగిరి, చిన్ననగిరి, యమన్ననగిరికి చెందిన యాదవరాజులు నెత్తికి తలపాగా, ఖడ్గం ధరించి రాజుల దుస్తుల్లో సైన్యం తో బయలుదేరారు. మద్దికెర గ్రామానికి మజరా గ్రామమైన బొజ్జనాయనపేటలో యాదవరాజులు నిర్మించుకున్న భోగేశ్వరస్వామి దేవాలయానికి వెళ్లి మూడు కుటుంబాల వారు ఆలయంలో పూజలు చేసి అనంతరం అశ్వాల పోటీలను నిర్వహిం చారు. దాదాపు నాలుగు కిలోమీటర్ల మేర జరిగిన ఈ అశ్వాల పారువేటలో మొదటి స్థానం యమన్ననగిరికి చెందికి జశ్వంత్‌రాయుడు, ద్వితీయ స్థానంలో చిన్ననగిరి, తృతీయ స్థానం పెద్దనగిరి అశ్వాలు నిలిచాయి. ఈ పారువేటను తిలకించడాని కి గ్రామస్థులు పెద్దఎత్తున తరలి వచ్చారు. విజయం సాధించిన అశ్వంతో రాజులు మెయిన్‌ బజారులో ఊరేగింపుగా వచ్చారు.

 శభాష్‌ జశ్వంత్‌రాయుడు: యాదవ కుటుంబానికి చెందిన పదేళ్ల బాలుడు జశ్వంత్‌రాయుడు అశ్వాల పారువేటలో పాల్గొన్నాడు. 11 మందిలో గుర్రాల పోటీలో పాల్గొనగా యశ్వంత్‌ విజయం సాధించడంతో పలువురు అభినందించారు.

Read more