పాడి పరిశ్రమ రంగంలో పెనుమార్పులు

సంగం డెయిరీ చైర్మన్‌ ధూళిపాళ్ల నరేంద్ర

వరల్డ్‌ డెయిరీ సమ్మిట్‌లో పాల్గొన్న డెయిరీ ప్రతినిధులు

 చేబ్రోలు, సెప్టెంబర్‌ 12: అంతర్జాతీయంగా పాడి పరిశ్రమ రంగంలో వస్తున్న మార్పులు అధ్యయనం చేయడానికి వరల్డ్‌ డెయిరీ సమ్మిట్‌ ఉపకరిస్తుందని సంగం డెయిరీ చైర్మన్‌ ధూళిపాళ్ళ నరేంద్రకుమార్‌ అన్నారు. దేశ రాజధాని ఢిల్లీలో జరుగుతున్న ఐడీఎఫ్‌ వరల్డ్‌ డెయిరీ సమ్మిట్‌-2022కు సంగం డెయిరీ చైర్మన్‌ ధూళిపాళ్ళ నరేంద్రకుమార్‌, ప్రతినిధులు సోమవారం హాజరయ్యారు. 48 ఏళ్ల తర్వాత దేశంలో జరుగుతున్న ఈ అంతర్జాతీయ సమ్మిట్‌ను సోమవారం ప్రధానమంత్రి నరేంద్రమోదీ నోయిడాలో ప్రారంభించినట్లు నరేంద్రకుమార్‌ వెల్లడించారు. ఈ సమ్మిట్‌ ద్వారా పాడి పరిశ్రమ రంగ అభివృద్ధి, సాంకేతికంగా వస్తున్న మార్పులు, ఎదురయ్యే సవాళ్లు, తీసుకోవాల్సిన చర్యలపై చర్చిస్తున్నట్లు తెలిపారు. నాలుగు రోజులపాటు జరిగే ఈ సమ్మిట్‌లో పాల్గొని డెయిరీ రంగ భవిష్యత్‌, అభివృద్ధిపై అధ్యయనం చేయనున్నట్లు చెప్పారు. సమ్మిట్‌లో డెయిరీ మేనేజింగ్‌ డైరెక్టర్‌ పి.గోపాలకృష్ణన్‌, పాలకవర్గ సభ్యులు, వివిధ విభాగాల అధికారులు పాల్గొన్నారు.