ADVT
15 నిమిషాల్లో పాస్‌బుక్‌.. పొందండిలా..!
09-02-2018 11:54:34
పాస్‌ పుస్తకం కావాలంటే ఎంత సమయం పడుతోంది... ఒక రోజు.. రెండు రోజులు.. వారం రోజులు.. కానే కాదు.. సంవత్సరాలు.. నెలలే.. మామూళ్లిస్తే మామూలుగా అయిపోయేది.. లేదంటే జారీకి గడువే ఉండేది కాదు.. అంతా రెవెన్యూ వారి చేతుల్లోనే ఉండేది. రైతులు మాత్రం కాళ్ళరిగేలా కార్యాలయం చుట్టూ తిరుగుతూనే ఉండేవారు. అయితే ఇదంతా గతం.. ప్రస్తుతం పాస్‌ పుస్తకం కావాలంటే అన్నీ సక్రమంగా ఉంటే 15 నిమిషాల్లో రెడీ.. అవునా అంటూ ఆశ్చర్యపోకండి మరి.. అదెలాగో తెలుసుకోవాలనుందా అయితే ఈ కథనం చదివేయండి మరి..
 
ఏలూరు: ఏ ధ్రువీకరణపత్రం కావాల్సినా.. కరెంట్‌ బిల్లు కట్టాలన్నా.. ఆధార్‌ నెంబర్‌ అనుసంధానం చేయాలన్నా.. ఓటు హక్కు కావాలన్నా.. ప్రతీ ఒక్కరి నోటా వినిపించే ఒకే ఒక మాట మీ సేవ.. అన్ని సేవలు ప్రస్తుతం మీ సేవలో అందుతున్నాయి..దీంతో ప్రభుత్వ కార్యాలయాలతో పనిలేకుండా పోయింది. ఏం అవసరమైనా మీ సేవలో దరఖాస్తు చేస్తున్నారు. గడువు పూర్తయిన తరువాత వచ్చి తీసుకుపోతున్నారు. దీనిలో భాగంగానే ప్రభుత్వం కూడా మీ సేవలను పెంచుతూ పోతోంది. ప్రస్తుతం పాస్‌ బుక్‌ కావాలంటే మండల కార్యాలయం చుట్టూ తిరగాల్సిన పనిలేదు. మీ సేవలో దరఖాస్తు చేస్తే చాలు 15 నిమిషాల్లో రెడీ..
 
పాస్‌ పుస్తకం పొందవచ్చు ఇలా...
రైతు తప్పనిసరిగా వెబ్‌ ల్యాండ్‌లో ఖాతాదారుగా నమోదు చేసుకుని ఉండాలి. అలాగే ఆధార్‌ సంఖ్యను వెబ్‌ ల్యాండ్‌ సంఖ్యతో అనుసంధానం చేయించుకోవాలి. రైతు లేదా పట్టాదారు సమీప మీ సేవ కేంద్రాన్ని సందర్శించి దరఖాస్తు పత్రాన్ని పూరించి వారి వేలిముద్ర వేయడం ద్వారా భూమి రికార్డును ప్రమాణీకరించుకుని పట్టాదారు పాస్‌పుస్తకం పొందాలి. గ్రామ ప్రాతిపదికన వెబ్‌ల్యాండ్‌లో ఉన్న ఖాతా ఆధార్‌ సంఖ్యతో పట్టాదారు పాస్‌పుస్తకం ముద్రిస్తారు. సంబంధిత రైతు భూమి వివరాలు మాత్రమే ఈ పాస్‌పుస్తకంలో ముద్రిస్తారు. మీ సేవ ద్వారా జారీ చేయబడే ప్రతీ పాస్‌పుస్తకానికి క్యూఆర్‌ కోడ్‌ ఇవ్వబడుతుంది.
 
ప్రత్యేక ఆండ్రాయిడ్‌ యాప్‌
భూ శోదక్‌ అనే ఆండ్రాయిడ్‌ యాప్‌ను పట్టాదారు పాస్‌పుస్తకం కోసం ప్రత్యేకంగా తయారు చేశారు. పాస్‌పుస్తకంలో ఉన్న క్యూఆర్‌ కోడ్‌ చిహ్నంను స్కాన్‌ చేస్తే ఆకు పచ్చ టిక్‌ మార్క్‌ పత్రం నిజమైనదని రఽధువీకరిస్తుంది. మీ సేవ ద్వారా జారీ చేసే పాస్‌ పుస్తకం, యునిక్‌ నెంబర్‌, క్యూఆర్‌ కోడ్‌ తప్పనిసరిగా ఇస్తారు. తహసీల్దార్‌ డిజిటల్‌ సంతకం చేయబడిన భూరికార్డులు మాత్రమే మీ సేవ ద్వారా పొందేందుకు అవకాశం ఉంది. ముద్రించబడిన టైటిల్‌ డీడ్‌ నందు తహసీల్దార్‌ సంతకం ఉండేది చెల్లుబాటు కాదు.
 
రైతు శ్రేయస్సే ధ్యేయంగా..
తప్పనిసరిగా దరఖాస్తుదారుడు బయోమెట్రిక్‌ వేయాలి. అన్నదాతలు మీ సేవలో రూ.25లు రుసుం చెల్లిస్తే పీడీఎఫ్‌ రూపంలో సాగు పుస్తకం ప్రింట్‌ పొందవచ్చు. తహసీల్దార్‌ డిజిటల్‌ సంతకం ఉండడంతో ఈ పాస్‌పుస్తకం చెల్లుబాటు అవుతుంది. వెబ్‌ల్యాండ్‌, అడంగళ్‌ సరిపోల్చి వాటిని కూడా కోడ్‌ రూపంలో ఉంచి ఎలక్ర్టానిక్‌ టైటిల్‌ డీడ్‌ కమ్‌ పట్టాదారు పాస్‌పుస్తకంగా పరిగణిస్తారు. ఉచితంగా డౌన్‌లోడ్‌ చేసుకోవచ్చు. ఇప్పటి వరకు వేలిముద్ర దరఖాస్తులు 11 వచ్చాయి. 923 వేలిముద్రలు ద్వారా మీ సేవలో పాస్‌పుస్తకాలు రైతులకు అందించాం.
- ఎంవి తిలక్‌, తహసీల్ధార్‌

Advertisement

Advertisement

Advertisement

Advertisement

అంతర్జాలంలో ప్రకటనల కొరకు సంప్రదించండి
| For internet advertisement and sales please contact
digitalsales@andhrajyothy.com
Copyright © and Trade Mark Notice owned by or licensed to Aamoda Publications PVT Ltd.
Designed & Developed by AndhraJyothy.