ఈ మోడల్ సాహసాన్ని చూసే దమ్ముందా?
17-02-2017 16:40:31
దుబాయ్ :  రికార్డులు బద్దలుగొట్టాలంటే దమ్ముండాలి. రోషమున్నోడే సాహసాలు చేయగలడు, విజయాలను సొంతం చేసుకోగలడు.
 
కానీ కొందరు చేసే సాహసాలను చూసేవాళ్ళకి కూడా ధైర్యం ఉండాలి. గుండె దిట్టంగా ఉన్నోళ్ళే అలాంటి సాహసాలను చూడగలుగుతారు.
 
ఒళ్ళు గగుర్పొడిచే సాహసాన్ని చేసి చూపించింది ఓ రష్యా మోడల్. ఫొటో షూట్ కోసం ఆమె ఆకాశ హర్మ్యం నుంచి వేలాడింది. ఆ దృశ్యాలను ఇన్‌స్టాగ్రామ్‌లో పోస్ట్ చేసింది. లక్షలాది మంది ఆ వీడియోను చూస్తున్నారు. కొందరు ఆమెను తిట్టిపోశారు. ప్రాణాలతో చెలగాటాడతావెందుకని నిలదీశారు. మరికొందరు ప్రశంసించారు.
 
రష్యన్ మోడల్ వికీ ఒడింట్కోవాకి సాహసాలంటే చాలా ఇష్టం. ప్రపంచం దద్దరిల్లేలా ఏదో ఒకటి చేస్తేగానీ మనసుండబట్టదు. అందుకే ఆకాశ హర్మాల నగరం దుబాయ్‌కి వెళ్ళింది. ఆమె వయసు 22 ఏళ్ళే. కానీ బుర్ర నిండా సృజనాత్మక ఆలోచనలే, గుండె నిండా ధైర్యమే.
 
 
సుమారు 70 అంతస్థుల ఎత్తు నుంచి వేలాడుతూ పొటో తీసుకోవాలనుకుంది. వెంటనే తాను పని చేసే యాడ్ ఏజెన్సీ మవ్రీన్ స్టూడియోస్ లైవ్ బృందంతో కలిసి ఓ బహుళ అంతస్థుల సౌధం మెట్లు ఎక్కేసింది. ఓ స్టంట్ మ్యాన్ సహాయంతో తాను అనుకున్నది చేసి చూపించింది. ఆమె చేతిని పట్టుకుని ఆ స్టంట్ మ్యాన్ గోడపై నిల్చున్నాడు. ఆమె నెమ్మదిగా బయటకు వేలాడింది. ఈ వీడియోను ఇన్‌స్టాగ్రామ్‌లో పోస్ట్ చేసింది.
 
ఆరు నిమిషాల నిడివిగల ఈ వీడియోను యూట్యూబ్‌లో సుమారు 8 లక్షల మంది చూశారు. అత్యధికులు ఆమెను, ఆ మీడియా సంస్థను తిట్టిపోశారు. యువతను తప్పుదారి పట్టిస్తున్నారని ఆరోపించారు.
 
దీంతో ఆమె మరో వీడియోను పోస్ట్ చేసింది. దాని మీద ‘‘ఈ స్టంట్స్ అన్నిటినీ నిపుణులు చేశారు, మీ అంతట మీరు వీటిని చేసే ప్రయత్నం చేయకండి’’ అనే సందేశాన్ని ఉంచింది.
అంతర్జాలంలో ప్రకటనల కొరకు సంప్రదించండి
| For internet advertisement and sales please contact
digitalsales@andhrajyothy.com
Copyright © and Trade Mark Notice owned by or licensed to Aamodha Publications PVT Ltd.
Designed & Developed by AndhraJyothy.